திருப்பரங்குன்றத்தில் டாஸ்மாக் கடைகளை அகற்றக்கோரி அனைத்துக்கட்சியினர் ஆர்ப்பாட்டம்

இதற்கிடையில் கடந்த 2 மாதங்களுக்கு முன்பு மார்க்சிஸ்ட் கம்யூனிஸ்டு கட்சி மற்றும் அனைத்து மாதர் சங்கம் சார்பில் நடத்தப்பட்ட போராட்டத்தை அடுத்து, 40 நாளில் 4 டாஸ்மாக் கடைகளையும் அப்புறப்படுத்துவதாக போலீசார் முன்னிலையில் டாஸ்மாக் அதிகாரிகள் உறுதி அளித்தனர். ஆனால் அதன்படி டாஸ்மாக் கடைகள் அகற்றப்படவில்லை.

இதனைத்தொடர்ந்து அனைத்துக்கட்சி சார்பில் திருப்பரங்குன்றத்தில் உள்ள 4 டாஸ்மாக் கடைகளை அகற்ற வலியுறுத்தி முற்றுகை போராட்டம் நடத்துவது என்று அறிவிக்கப்பட்டது. அதன்படி நேற்று திருப்பரங்குன்றம் பஸ் நிலையம் முன்பு அனைத்துக்கட்சியினரும் திரண்டனர். அப்போது அங்கு வந்த கலால் அதிகாரி மதிவாணன், பார் தொடர்பான வழக்கு இருப்பதாகவும், தற்காலிகமாக கடையை மூடுவதாகவும் கூறினார். இதையடுத்து முற்றுகை போராட்டம் கைவிடப்பட்டது.

இருப்பினும் நிரந்தரமாக டாஸ்மாக் கடைகளை அகற்றக்கோரி அனைத்துக்கட்சி சார்பில் ஆர்ப்பாட்டம் நடைபெற்றது. ஆர்ப்பாட்டத்திற்கு தி.மு.க. மாநகர் தெற்கு மாவட்ட செயலாளர் தளபதி தலைமையில் தி.மு.க. பகுதி செயலாளர் கிருஷ்ணபாண்டி, மார்க்சிஸ்ட் கம்யூனிஸ்டு கட்சி மாவட்ட செயலாளர் ராமகிருஷ்ணன், தாலுகா செயலாளர் ராஜூ ஆகியோர் முன்னிலை வகித்தனர். ஆர்ப்பாட்டத்தில் மதுரை மாநகர் மாவட்ட காங்கிரஸ் தலைவர் கார்த்திகேயன், மாவட்ட துணை தலைவர் மகேந்திரன், தே.மு.தி.க. சார்பில் கணபதி, இந்திய கம்யூனிஸ்டு கட்சி சார்பில் மகாமுனி, த.மா.கா. சார்பில் ஆறுமுகம் உள்பட பலர் கலந்துகொண்டனர்.