காரில் கடத்தி வரப்பட்ட மதுபாட்டில்கள் பறிமுதல் டிரைவர் கைது

விழுப்புரம்,

புதுச்சேரி மாநிலத்தில் இருந்து விழுப்புரம் மாவட்டம் வழியாக மதுபாட்டில்கள் கடத்தப்படுவதாக கிடைத்த தகவலின்பேரில் கோட்டக்குப்பம் அருகே அனிச்சங்குப்பம் சோதனைச்சாவடியில் நேற்று அதிகாலை போலீஸ் சப்-இன்ஸ்பெக்டர் குணசேகரன் தலைமையிலான போலீசார் தீவிர கண்காணிப்பு பணியில் ஈடுபட்டனர். அப்போது அந்த வழியாக வேகமாக வந்த ஒரு காரை போலீசார் சந்தேகத்தின்பேரில் வழிமறித்து சோதனை செய்ததில் அந்த காருக்குள் அட்டை பெட்டிகளில் 552 மதுபாட்டில்கள் பதுக்கி வைத்து கடத்திவரப்பட்டது கண்டு பிடிக்கப்பட்டது. உடனே அந்த காரை ஓட்டி வந்த டிரைவரை பிடித்து போலீசார் விசாரணை நடத்தினார்கள்.

பறிமுதல்

விசாரணையில் அவர் மரக்காணம் அருகே கரிப்பாளையம் கிராமத்தை சேர்ந்த மாரியப்பன் மகன் அசோக் (வயது 38) என்பதும் புதுச்சேரியில் இருந்து சென்னைக்கு மதுபாட்டில்களை கடத்த முயன்றதும் தெரியவந்தது.

இதையடுத்து அசோக்கை போலீசார் கைது செய்து அவரிடமிருந்த ரூ.1 லட்சம் மதிப்புள்ள மதுபாட்டில்களையும், கடத்தலுக்கு பயன்படுத்தப்பட்ட ரூ.5 லட்சம் மதிப்புள்ள காரையும் பறிமுதல் செய்து கோட்டக்குப்பம் போலீஸ் நிலையத்தில் ஒப்படைத்தனர்.