டாஸ்மாக் கடையை இடமாற்றும் பிரச்சினை பா.ம.க. துணைத்தலைவரிடம் கலெக்டர் விசாரணை

விருதுநகர்,

சிவகாசி அய்யனார் காலனியில் செயல்பட்டு வரும் டாஸ்மாக் கடையை வேறு இடத்துக்கு மாற்றம் செய்யக் கோரி பா.ம.க. மாநில துணைத்தலைவர் திலகபாமா மதுரை ஐகோர்ட்டு கிளையில் வழக்கு தொடர்ந்தார். கடந்த மாதம் 17-ந்தேதி நடந்த வழக்கு விசாரணையின் போது சம்பந்தப்பட்ட இடத்தை நேரடி ஆய்வு செய்தும், மனுதாரரை விசாரணை செய்தும் இம்மாதம் 7-ந்தேதிக்குள் அறிக்கை தாக்கல் செய்ய வேண்டும் என விருதுநகர் மாவட்ட கலெக்டருக்கு மதுரை ஐகோர்ட்டு உத்தரவிட்டது.

அதன் அடிப்படையில் நேற்று திலகபாமா, கலெக்டர் விசாரணைக்காக ஆஜரானார். கடையை இட மாற்றம் செய்யவேண்டியதன் அவசியத்தை அவர் விளக்கினார்.

சம்பந்தப்பட்ட டாஸ்மாக் கடை அருகே 2 பள்ளிக் கூடங்கள், குடியிருப்புகள், வழிபாட்டு தலங்கள் மற்றும் தொழிற்சாலைகள் இருப்பதை கலெக்டர் சிவஞானத்திடம் தெரிவித்ததாகவும் அதற்கான ஆவணங்களை சமர்ப்பித்ததாகவும் விசாரணை முடிந்து வந்த திலகபாமா தெரிவித்தார். அவருடன் கட்சி நிர்வாகிகள் உள்ளிட்டோரும் வந்திருந் தனர்.