திருவாரூர் மாவட்டத்தில் குரூப்-2 தேர்வை 8,424 பேர் எழுதினர்

திருவாரூர்,

தமிழ்நாடு அரசு பணியாளர் தேர்வாணையம் நடத்தும் குரூப்-2 தேர்வு நேற்று நடந்தது. திருவாரூர் மாவட்டத்தில் திருவாரூர், மன்னார்குடி, திருத்துறைப்பூண்டி ஆகிய 3 இடங்களில் 23 மையங்களில் இந்த தேர்வு நடைபெற்றது. இதில் திருவாரூர் திரு.வி.க. கல்லூரியில் நடந்த தேர்வினை மாவட்ட கலெக்டர் நிர்மல்ராஜ் நேரில் பார்வையிட்டு ஆய்வு செய்தார்.

அப்போது அவர் கூறியதாவது:-

தமிழ்நாடு அரசு பணியாளர் தேர்வாணையம் நடத்தும் குரூப்-2 தேர்வு திருவாரூர் மாவட்டத்தில் 23 மையங்களில் நடைபெற்றது. இதில் திருவாரூரில் 11 ஆயிரத்து 258 பேர்கள் தேர்வு எழுத விண்ணப்பித்து இருந்தனர். இதில் 8,424 பேர் தேர்வு எழுதினர். 2,834 பேர் தேர்வு எழுத வரவில்லை.

தேர்வு மையங்களில் குடிநீர், தடையில்லாத மின்சாரம் போன்ற தேவையான வசதிகள் செய்யப்பட்டு இருந்தது. மையங்களை கண்காணிக்க தாசில்தார் தலைமையில் 6 சுற்றுக்குழு அமைக்கப்பட்டது. துணை கலெக்டர்கள் தலைமையில் 3 பறக்கும் படை, தேர்வுகளை முழுமையாக வீடியோவில் ஒளிப்பதிவு செய்ய 23 வீடியோ ஒளிப்பதிவாளர்கள் பணியில் ஈடுபடுத்தபட்டனர்.

இவ்வாறு கலெக்டர் கூறினார்.

ஆய்வின்போது தாசில்தார் அம்பிகாபதி, செய்தி மக்கள் தொடர்பு அதிகாரி தனபால் உள்பட பலர் உடன் இருந்தனர்.