நீல திமிங்கல விளையாட்டுக்கு பலியாவது என் மகனோடு முடியட்டும் மதுரை மாணவரின் தந்தை உருக்கமான பேட்டி

திருப்பரங்குன்றம்,

மதுரையை அடுத்த விளாச்சேரி மொட்டமலையை சேர்ந்தவர் ஜெயமணி. பேக்கரியில் வேலை பார்த்து வருகிறார். இவருடைய மகன் விக்னேஷ் (வயது 19). அதே பகுதியில் உள்ள ஒரு தனியார் கல்லூரியில் பி.காம் 2–ம் ஆண்டு படித்து வந்தார்.

நேற்று முன்தினம் வீட்டில் தனியாக இருந்த விக்னேஷ் தூக்குப்போட்டு தற்கொலை செய்து கொண்டார்.

இதுபற்றி போலீசார் வழக்குப் பதிவு செய்து விசாரித்தபோது, ‘புளூ வேல்’ எனப்படும் நீல திமிங்கல விளையாட்டுக்கு அடிமையாகி, விக்னேஷ் தற்கொலை செய்து கொண்டது தெரியவந்தது.

விக்னேஷ் தனது கையில் திமிங்கலத்தின் உருவத்தை வரைந்து இருந்தார். மேலும் அவருடைய நோட்டுப்புத்தகத்திலும் திமிங்கலத்தின் படத்தை வரைந்து வைத்திருந்தார். அதில், ‘‘நீல திமிங்கலம் இது விளையாட்டல்ல விபரீதம். ஒருமுறை உள்ளே போனால், வெளியில் வர முடியாது’’ என்று எழுதி வைத்திருந்தார்.

இதனால் அவர் இணைய தளம் வழியாக நீல திமிங்கல விளையாட்டை விளையாடியதால் மன அழுத்தத்துக்கு ஆளாகி தற்கொலை செய்து கொண்டது உறுதியானது.

விக்னேஷ் முதலாமாண்டில் நன்றாக படித்து தேர்ச்சி பெற்றுள்ளார். இதற்காக அவருடைய பாட்டி சமீபத்தில் ஒரு ஆன்ட்ராய்டு செல்போனை வாங்கி கொடுத்துள்ளார்.

விக்னேஷ் பள்ளியில் படிக்கும் போதும், கல்லூரியில் படித்து வந்த போதும் சக மாணவர்களுடன் சகஜமாக பேசி பழகி வந்துள்ளார். ஆனால் சமீபத்தில் நீல திமிங்கல விளையாட்டுக்கு அடிமையானதில் இருந்து தனிமையை விரும்பி தனியாக காணப்பட்டதோடு விரக்தியில் இருந்துள்ளார்.

எப்போதும் பெற்றோர்களுடன் பாசமாக இருந்து வந்த விக்னேஷ் கடந்த சில நாட்களுக்கு முன்பு தந்தையிடம் தகராறு செய்து முரண்பாடாக நடந்து உள்ளார். அதே போல அவரது எதிர் வீட்டில் உள்ள ஒரு குழந்தையிடமும் பாசமாக இருந்தவர், திடீரென அந்த குழந்தையை கண்டு கொள்ளாமல் இருந்திருக்கிறார். இந்த நிலையில் தான் நீல திமிங்கல விளையாட்டு அவரது உயிரை குடித்துள்ளது.