பஸ் மோதி பள்ளி மாணவன் பலி

வேடசந்தூர்,

வேடசந்தூர் அருகே உள்ள டொக்குவீரன்பட்டியை சேர்ந்தவர் பெரியசாமி. கொத்தனார். அவருடைய மகன் வினித்குமார் (வயது 12). இவன் தேவநாயக்கன்பட்டியில் உள்ள அரசு உயர்நிலைப்பள்ளியில் 7-ம் வகுப்பு படித்து வந்தான். நேற்று மாலை பள்ளி முடிந்து சைக்கிளில் வீட்டுக்கு சென்று கொண்டிருந்தான். புதுரோடு- வேடசந்தூர் ரோட்டில் தேவநாயக்கன்பட்டியை அடுத்து சென்று கொண்டிருந்தபோது, எதிரே வேடசந்தூரில் இருந்து ஆர்.கோம்பை நோக்கி வந்த அரசு டவுன் பஸ், எதிர்பாராத விதமாக வினித்குமார் ஓட்டி சென்ற சைக்கிள் மீது மோதியது.

இதில் தூக்கி வீசப்பட்டதில் வினித்குமார் சம்பவ இடத்திலேயே பரிதாபமாக இறந்தான். இதனால் ஆத்திரம் அடைந்த பொதுமக்கள் பஸ்சின் கண்ணாடியை உடைத்தனர். இந்த விபத்து குறித்து தகவல் அறிந்ததும் வேடசந்தூர் போலீசார் சம்பவ இடத்துக்கு விரைந்து வந்தனர். பின்னர் வினித்குமாரின் உடலை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.