பெங்களூரு அருகே பயங்கரம் கந்துவட்டிக்காரர் சுட்டுக்கொலை

பெங்களூரு,

பெங்களூரு புறநகர் மாவட்டம் தொட்டபள்ளாப்புரா தாலுகா சிக்கபெலவங்கலா கிராமத்தை சேர்ந்தவர் முத்து கிருஷ்ணா (வயது 41). கந்துவட்டிக்காரரான இவர் விவசாயமும் செய்து வந்தார். நேற்று முன்தினம் மாலை 6 மணியளவில் தொட்டபெலவங்கலாவில் இருந்து சிக்கபெலவங்கலாவில் உள்ள வீட்டுக்கு மோட்டார் சைக்கிளில் சென்று கொண்டிருந்தார். சிக்கபெலவங்கலா அருகே சென்றபோது காரில் வந்த மர்மநபர்கள் திடீரென்று முத்து கிருஷ்ணாவை நோக்கி சரமாரியாக துப்பாக்கியால் சுட்டுவிட்டு அங்கிருந்து சென்றுவிட்டனர். இதில், ஒரு குண்டு முத்துகிருஷ்ணாவின் உடலில் பாய்ந்தது.

போலீஸ் விசாரணை

இதனால், அவர் ரத்த வெள்ளத்தில் சம்பவ இடத்தில் சரிந்து விழுந்து உயிருக்கு போராடினார். இதை பார்த்த அக்கம்பக்கத்தினர் அவரை மீட்டு அருகே உள்ள மருத்துவமனையில் அனுமதித்தனர். அங்கு அவரை டாக்டர்கள் பரிசோதித்தனர். அப்போது அவர் ஏற்கனவே இறந்துபோய்விட்டது தெரியவந்தது. இதுகுறித்து தகவல் அறிந்தவுடன் தொட்டபெலவங்கலா போலீசார் விரைந்து வந்து முத்து கிருஷ்ணாவின் உடலை கைப்பற்றி பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர்.

மேலும், சம்பவ இடத்துக்கு சென்ற போலீசார் அங்கு ஆய்வு நடத்தி விசாரணை நடத்தினார்கள். ஆனால் முத்து கிருஷ்ணாவை யார் சுட்டுக்கொன்றார்கள்? என்பது தெரியவில்லை. இருப்பினும் பணத்தகராறில் கொலை நடந்து இருக்கலாம் என்று போலீசார் சந்தேகிக்கிறார்கள். இதுகுறித்த புகாரின் பேரில் தொட்டபெலவங்கலா போலீசார் வழக்குப்பதிவு செய்து விசாரணை நடத்தி மர்மநபர்களை வலைவீசி தேடிவருகிறார்கள்.