கொருக்குப்பேட்டையில் கணவன்–மனைவி தூக்குப்போட்டு தற்கொலை

ராயபுரம்,

சென்னை கொருக்குப்பேட்டை காமராஜர் நகர், நாவல் தெருவில் வசித்து வந்தவர் சண்முகம்(வயது 75). இவருடைய மனைவி கிருஷ்ணவேணி(65). இவர்களுக்கு ஆனந்தகுமார் என்ற மகனும், ஜானகி என்ற மகளும் உள்ளனர். இருவருக்கும் திருமணமாகி மகன் வண்டலூரிலும், மகள் விழுப்புரத்திலும் குடும்பத்துடன் வசித்து வருகின்றனர்.

சொந்த வீட்டில் தனது மனைவியுடன் வசித்து வந்த சண்முகம், தனக்கு சொந்தமான மற்றொரு வீட்டை வாடகைக்கு விட்டு அதில் வரும் வருமானத்தை வைத்து வாழ்க்கையை நடத்தி வந்தார்.

நேற்று காலை நீண்ட நேரம் ஆகியும் சண்முகம் வீட்டின் கதவு திறக்கப்படவில்லை. இதனால் அவரது வீட்டில் வாடகைக்கு வசித்து வருபவரும், அக்கம் பக்கத்தினரும் சந்தேகம் அடைந்தனர். கதவை தட்டிப்பார்த்தும் திறக்காததால் ஆர்.கே.நகர் போலீசாருக்கு தகவல் கொடுத்தனர்.

சம்பவ இடத்துக்கு விரைந்து வந்த போலீசார், கதவை உடைத்து உள்ளே சென்று பார்த்த போது, கணவன்–மனைவி இருவரும் தூக்கில் பிணமாக தொங்குவதை கண்டு அதிர்ச்சி அடைந்தனர்.

போலீசார் 2 பேரின் உடல்களையும் மீட்டு பிரேத பரிசோதனைக்காக ஸ்டான்லி ஆஸ்பத்திரிக்கு அனுப்பி வைத்தனர். மேலும் இதுபற்றி போலீசார் வழக்குப்பதிவு செய்து விசாரித்தனர்.

சண்முகம் இதய நோயாலும், கிருஷ்ணவேணி சிறுநீரக பிரச்சினையாலும் அவதிப்பட்டு வந்ததாக தெரிகிறது. மகன், மகள் இருந்தும் அவர்கள் தனித்தனியாக வசித்து வருவதால் வயதான காலத்தில் கவனிக்க ஆள் இல்லாமலும், ஒருவரை ஒருவர் கவனித்துக்கொள்ள முடியாமலும் கணவன்–மனைவி இருவரும் அவதிப்பட்டு வந்தனர்.

பெற்ற பிள்ளைகள் இருந்தும் கவனிக்க ஆள் இல்லாமல் அனாதைகள் போல் இருக்கிறோமே என கணவன்–மனைவி இருவரும் மனவேதனையில் இருந்து வந்தனர். இதனால் விரக்தி அடைந்த சண்முகம், கிருஷ்ணவேணி இருவரும் நேற்று முன்தினம் வீட்டில் தூக்குப்போட்டு தற்கொலை செய்துகொண்டது விசாரணையில் தெரிய வந்ததாக போலீசார் தெரிவித்தனர்.

இந்த சம்பவம் அந்த பகுதியில் பெரும் சோகத்தை ஏற்படுத்தி உள்ளது.