மாவூர் அணையில் மூழ்கி கல்லூரி மாணவர் பலி

கொடைரோடு,

மதுரை மாவட்டம் பழங்காநத்தம் பகுதியை சேர்ந்தவர் ஹரிராம் (வயது 21). இவர், அந்த பகுதியில் உள்ள ஒரு கல்லூரியில் படித்து வந்தார். இவர், தனது நண்பர்களான சுந்தரேசன், கிருஷ்ணாஅசோக், செண்பகராஜ் உள்பட 8 பேருடன், திண்டுக்கல் மாவட்டம் கொடைரோடு அருகே சிறுமலை அடிவாரத்தில் உள்ள மாவூர் அணைக்கு குளிப்பதற்காக வந்தார்.பின்னர் அவர்கள் அணையில் குளித்து கொண்டிருந்தனர். அப்போது ஹரிராம், கிருஷ்ணாஅசோக் ஆகியோர் அணையில் ஆழமான பகுதிக்கு சென்றதாக கூறப்படுகிறது. அவர்களுக்கு நீச்சல் தெரியாததால் தண்ணீரில் தத்தளித்தபடி கூச்சல் போட்டுள்ளனர். சக நண்பர்கள் அவர்களை மீட்கும் முயற்சியில் ஈடுபட்டனர். இதில், கிருஷ்ணாஅசோக்கை மீட்டனர். ஆனால் ஹரிராம் தண்ணீருக்குள் மூழ்கினார்.

இதுகுறித்து நிலக்கோட்டை தீயணைப்பு நிலையத்துக்கு தகவல் கொடுக்கப்பட்டது. நிலைய அலுவலர் ஜோசப் தலைமையிலான வீரர்கள் சம்பவ இடத்துக்கு விரைந்து வந்தனர். பின்னர் அணையில் மூழ்கிய ஹரிராமை உயிருடன் மீட்டனர். பின்னர் அவருக்கு முதலுதவி சிகிச்சை அளித்து, நிலக்கோட்டை அரசு மருத்துவமனைக்கு அனுப்பி வைத்தனர்.

அங்கு பரிசோதனை செய்த டாக்டர்கள், வரும் வழியிலேயே ஹரிராம் இறந்து விட்டதாக தெரிவித்தனர். இதுகுறித்து அம்மையநாயக்கனூர் போலீசார் வழக்குப்பதிவு செய்து விசாரணை நடத்தி வருகின்றனர். அணையில் குளித்தபோது, தண்ணீரில் மூழ்கி கல்லூரி மாணவர், இறந்த சம்பவம் பெரும் சோகத்தை ஏற்படுத்தி உள்ளது.