சித்தராமையாவை சிறையில் அடைப்போம் மாற்றத்திற்கான பயண கூட்டத்தில் எடியூரப்பா பேச்சு

கர்நாடகத்தில் பா.ஜனதா ஆட்சி அமைந்தால் கிடப்பில் போடப்பட்டுள்ள அனைத்து வழக்குகளும் தூசி தட்டி எடுக்கப்படும். சித்தராமையா உள்பட புகார்களுக்கு உள்ளானவர்களை சிறையில் அடைப்போம். மாநிலத்தில் இந்துமத அமைப்புகளின் தொண்டர்கள் கொலை செய்யப்படுகிறார்கள். சட்டம்–ஒழுங்கு முழுவதுமாக சீர்குலைந்துவிட்டது.

சித்தராமையா அரசு செத்துவிட்டதாக மக்கள் கருதுகிறார்கள். கர்நாடகத்தில் கொலை, கொள்ளை, கொலை முயற்சி, திருட்டு போன்ற சம்பவங்கள் அதிகரித்துவிட்டன. இது வளர்ச்சியின் மீது தாக்கத்தை ஏற்படுத்தியுள்ளது. இதனால் முதலீட்டாளர்கள் கர்நாடகத்திற்கு வர தயங்குகிறார்கள். மாநிலத்தில் மணல் கொள்ளை ஜோராக நடக்கிறது.

இமாச்சல பிரதேசம், குஜராத்தில் பா.ஜனதா ஆட்சியை பிடிக்கும். அதன் பிறகு கர்நாடகத்தில் நடைபெறும் தேர்தலிலும் பா.ஜனதா ஆட்சிக்கு வரும். நாங்கள் ஆட்சிக்கு வந்த பிறகு வளர்ச்சி பணிகளை மேற்கொள்வோம். தன்னை கண்டால் பிரதமர் மோடிக்கு பயம் என்று சித்தராமையா சொல்கிறார். இது முட்டாள்தனமான பேச்சு. மோடிக்கு முன்பு சித்தராமையா ஒன்றும் இல்லை.

இவ்வாறு எடியூரப்பா பேசினார்.