பெங்களூருவில் பயங்கரம் நடுரோட்டில் வாலிபர் வெட்டிக் கொலை 4 பேருக்கு போலீஸ் வலைவீச்சு

பெங்களூரு,

பெங்களூருவில் நடுரோட்டில் வாலிபரை வெட்டிக் கொலை செய்த பயங்கரம் நடந்துள்ளது. இதுதொடர்பாக 4 பேரை போலீசார் வலைவீசி தேடிவருகிறார்கள்.

மர்மநபர்கள் வழிமறித்தனர்

பெங்களூரு கல்கெரே அருகே வசித்து வந்தவர் சதீஷ் ரெட்டி என்ற சதீஷ் (வயது 30). இவர், வாகனம் சுத்தம் செய்யும் பணிமனை நடத்தி வந்தார். அதாவது கல்கெரே, பன்னரகட்டா பகுதிகளில் உள்ள அடுக்குமாடி குடியிருப்புகளில் வசிப்பவர்களின் கார்களை குத்தகை அடிப்படையில் சுத்தம் செய்யும் தொழில் செய்து வந்தார். இதற்காக வேலைக்கு ஏராளமான வாலிபர்களை சதீஷ் ரெட்டி வைத்திருந்தார். இவரது மனைவி பன்னரகட்டா பகுதியில் உள்ள ஒரு தனியார் நிறுவனத்தில் ஊழியராக வேலை செய்து வருகிறார். தினமும் அவரை மோட்டார் சைக்கிளில் அழைத்து சென்று நிறுவனத்தில் சதீஷ் ரெட்டி விடுவது வழக்கம்.

அதுபோல, நேற்று காலையில் மனைவியை அழைத்து கொண்டு நிறுவனத்தில் விட்டுவிட்டு மோட்டார் சைக்கிளில் அவர் வீட்டிற்கு புறப்பட்டார். பன்னரகட்டா மெயின் ரோடு, பெங்கிபுரா பகுதியில் சதீஷ் ரெட்டி வந்து கொண்டிருந்தார். அப்போது அங்கு மோட்டார் சைக்கிள்களில் வந்த மர்மநபர்கள் சதீஷ் ரெட்டியை வழிமறித்தார்கள்.

வெட்டிக் கொலை

இந்த நிலையில் திடீரென்று அந்த மர்மநபர்கள் தாங்கள் வைத்திருந்த அரிவாள், கத்தி போன்ற ஆயுதங்களால் சதீஷ் ரெட்டியை சரமாரியாக தாக்கினார்கள். உடனே மர்மநபர்களிடம் இருந்து அவர் தப்பித்து ஓட முயன்றார். ஆனாலும் அவரை விடாமல் மர்மநபர்கள் நடுரோட்டில் வைத்து சரமாரியாக அரிவாளால் வெட்டினார்கள்.

இதில், பலத்த காயம் அடைந்த சதீஷ் ரெட்டி ரத்த வெள்ளத்தில் சம்பவ இடத்திலேயே துடிதுடித்து பாதாபமாக உயிர் இழந்தார். உடனே அங்கிருந்து மர்மநபர்கள் தப்பிச்சென்று விட்டார்கள். இதுபற்றி பன்னரகட்டா போலீசாருக்கு தகவல் தெரிவிக்கப்பட்டது. சம்பவ இடத்திற்கு விரைந்து வந்த போலீசார், சதீஷ் ரெட்டியின் உடலை கைப்பற்றி விசாரித்தனர். பின்னர் அவரது உடல் பிரேத பரிசோதனைக்காக ஆஸ்பத்திரிக்கு அனுப்பி வைக்கப்பட்டது.

4 பேருக்கு வலைவீச்சு

போலீஸ் விசாரணையில், 2 மோட்டார் சைக்கிள்களில் வந்த 4 மர்மநபர்கள் சதீஷ் ரெட்டியை அரிவாளால் வெட்டிக் கொலை செய்தது தெரியவந்தது. சதீஷ் ரெட்டி கடந்த 6 மாதங்களாக ரவுடியிசத்தில் ஈடுபட்டு வந்துள்ளார். அந்த சம்பவங்களில் அவர் நேரடியாக ஈடுபடாமல் தன்னிடம் வேலை பார்க்கும் வாலிபர்களை பயன்படுத்தியதாக கூறப்படுகிறது. இதனால் முன்விரோதத்தில் சதீஷ் ரெட்டி கொலை செய்யப்பட்டு இருக்கலாம் என்று போலீசார் சந்தேகிக்கின்றனர்.

கொலையாளிகளை பிடிக்க துணை போலீஸ் சூப்பிரண்டு உமேஷ் மேற்பார்வையில் தனிப்படை அமைக்கப்பட்டு உள்ளது. இதுகுறித்து பன்னரகட்டா போலீசார் வழக்குப்பதிவு செய்து தலைமறைவான 4 மர்மநபர்களையும் வலைவீசி தேடிவருகிறார்கள். நடுரோட்டில் நடந்த இந்த கொலை சம்பவம் அப்பகுதியில் நேற்று பரபரப்பை ஏற்படுத்தியது.