அரசு பள்ளி ஆசிரியரை தாக்கிய 4 பேர் கைது

பாடாலூர்,

பெரம்பலூர் மாவட்டம், ஆலத்தூர் தாலுகா பாடாலூரில் அரசு மேல்நிலைப்பள்ளி உள்ளது. இந்த பள்ளியில் ஆயிரத்திற்கும் மேற்பட்ட மாணவ-மாணவிகள் படித்து வருகின்றனர். பள்ளியில் அப்பகுதியை சேர்ந்த மாணவன் ஒருவன் 7-ம் வகுப்பு படித்து வருகிறான். பள்ளிக்கு அந்த மாணவன் நேற்று தாமதமாக வந்துள்ளான். இதனால் அந்த மாணவனை வகுப்பு ஆசிரியர் கண்டித்துள்ளார். மேலும் மாணவனை வீட்டிற்கு செல்லுமாறு ஆசிரியர் கூறியுள்ளார்.

4 பேர் கைது

இதுகுறித்து அந்த மாணவன், தனது தந்தை கணேசனிடம் (வயது 35) கூறியுள்ளார். இதையடுத்து அவர் அதே பகுதியை சேர்ந்த கார்த்திக் (25), மணிகண்டன் (23), பிரகாஷ் (26) ஆகியோருடன் பள்ளிக்கு சென்றனர். பள்ளியில் அதே வகுப்பில் பாடம் நடத்திய ஆசிரியர் பாடாலூர் அண்ணாநகர் பகுதியை சேர்ந்த ரத்தினவேல் என்பவரை பணி செய்ய விடாமல் தடுத்து சரமாரியாக தாக்கியுள்ளனர். இதில் ஆசிரியர் மண்டை உடைந்து காயமடைந்தார். இதையடுத்து அவரை சக ஆசிரியர்கள் மீட்டு சிகிச்சைக்காக பெரம்பலூர் அரசு மருத்துவமனையில் சேர்த்தனர். இது குறித்த புகாரின் பேரில் பாடாலூர் போலீசார் வழக்குப்பதிவு செய்து ஆசிரியரை தாக்கிய 4 பேரையும் கைது செய்து விசாரணை நடத்தி வருகின்றனர்.