பயந்தர் ரெயில் நிலைய டிக்கெட் கவுண்ட்டரை அடித்து நொறுக்கிய திருடன்

மும்பை,

மேற்கு ரெயில்வே வழித்தடத்தில் உள்ள பயந்தர் ரெயில்நிலையம் மேற்கு பகுதியில் உள்ள டிக்கெட் கவுண்ட்டருக்கு நேற்று காலை 6 மணியளவில் ஊழியர் ஒருவர் பணிக்கு வந்தார். அப்போது, டிக்கெட் கவுண்ட்டரில் இருந்த பொருட்கள் உடைக்கப்பட்டு இருந்தன. மேலும் அங்கிருந்த பொருட்கள் சிதறிக்கிடந்தன.

இதைப்பார்த்து அதிர்ச்சி அடைந்த ஊழியர் உடனடியாக ரெயில்வே போலீசாருக்கு தகவல் கொடுத்தார். ரெயில்வே போலீசார் விரைந்து வந்து, டிக்கெட் கவுண்ட்டரில் இருந்த கண்காணிப்பு கேமராவில் பதிவான காட்சிகளை ஆய்வு செய்தனர்.

அதில், அதிகாலை நேரத்தில் திருடன் ஒருவன் டிக்கெட் கவுண்ட்டருக்குள் நுழையும் காட்சிகள் பதிவாகி இருந்தது. திருடன் முதலில் டிக்கெட் கவுண்ட்டரில் உள்ள பெட்டிகளில் பணம் ஏதும் உள்ளதா? என தேடுகிறான். ஆனால் அங்கு பணம் ஏதுமில்லை. இதனால் ஆத்திரமடைந்த திருடன் அங்குள்ள பொருட்களை அடித்து நொறுக்கிவிட்டு, அங்கிருந்து செல்லும் காட்சி பதிவாகி இருந்தது.

இந்த சம்பவம் குறித்து வழக்குப்பதிவு செய்த போலீசார் டிக்கெட் கவுண்ட்டரை உடைத்து சென்ற திருடனை வலைவீசி தேடிவருகின்றனர்.