துப்புரவு தொழிலாளர்களுக்கு ஓய்வூதியம் வழங்க வேண்டும், தூய்மை தொழிலாளர் சங்கம் கோரிக்கை

விருதுநகர்,

தமிழ்நாடு தூய்மை தொழிலாளர் சங்க மாநில தலைவர் சக்திவேல் வெளியிட்டுள்ள அறிக்கையில் கூறியிருப்பதாவது:-

துப்புரவு பணியாளர்களுக்கு 7-வது ஊதியக்குழுவின் பரிந்துரைப்படி நிலுவைத்தொகையுடன் கூடியஊதியம் வழங்குவதோடு .அரசு ஆணை எண் 129-ன் படி சிறப்பு காலமுறை ஊதியம் வழங்க வேண்டும். சிறப்பு காலமுறை ஊதியம் பெற்று வருவோருக்கு வீட்டுவாடகைப்படி ரூ.240, மருத்துவப்படி ரூ.100 ஆகியவற்றை 2013-ம் ஆண்டு முதல் நிலுவை தொகையுடன் வழங்க வேண்டும். இந்த மாவட்டத்தில் பணியில் இருக்கும் போது இறந்த 20-க்கும் மேற்பட்ட துப்புரவு தொழிலாளர்களுக்கு குழுகாப்பீட்டுத்தொகை ரூ.3 லட்சம் வழங்கப்படாமல் உள்ளது.

1992-ம் ஆண்டு முதல் 2006-ம் ஆண்டு வரை வழங்க வேண்டிய அகவிலைப்படி நிலுவைத்தொகை ரூ.49,140-ம், 2007-ம் முதல் 2009-ம் ஆண்டு வரை வழங்க வேண்டிய ஊதிய நிலுவை தொகை ரூ.18,710-ம் உடனடியாக வழங்க வேண்டியது அவசியமாகும். 450 கிராம பஞ்சாயத்தில் பணிபுரியும் 1,500-க்கும் மேற்பட்ட துப்புரவு பணியாளர்களுக்கு பணிப்பதிவேட்டினை உடனடியாக பதிவு செய்து அதன் நகலை வழங்க வேண்டும். 5 ஆண்டுகளுக்கு மேலாக வழங்கப்படாமல் உள்ள சீருடை மற்றும் பணிதளவாடங்கள் வழங்க வேண்டும்

பணி ஓய்வு பெற்ற துப்புரவு பணியாளர்களுக்கு சிறப்பு மாதஓய்வூதியம் ரூ.2 ஆயிரம், சிறப்பு பணப்பலன் ரூ.50 ஆயிரம் ஆகியவற்றை 1.1.2014-ல் இருந்து வழங்க நடவடிக்கை எடுப்பதோடு 3 ஆண்டுகளாக மருத்துவ காப்பீட்டுத்தொகை பிடித்தம் செய்யப்பட்டு வரும் நிலையில் இதுவரை வழங்கப்படாமல் உள்ள மருத்துவ காப்பீட்டு அட்டை வழங்க வேண்டும். மாதஊதியத்தை 5-ந் தேதிக்குள் வழங்க வேண்டும். இவ்வாறு அந்த அறிக்கையில் கூறப்பட்டுள்ளது.

இந்த கோரிக்கைகளை வலியுறுத்தி விருதுநகர் கலெக்டர் அலுவலகம் முன்பு தூய்மை தொழிலாளர் சங்கத்தின் சார்பில் ஆர்ப்பாட்டம் நடைபெற்றது. இதில் மாநிலதலைவர் சக்திவேல் மற்றும் மாவட்ட நிர்வாகிகள் கலந்து கொண்டனர்.