உத்திரமேரூர் அருகே மின்வேலியில் சிக்கி விவசாயி பலி

உத்திரமேரூர்,

உத்திரமேரூர் அடுத்த சோழனூர் கிராமத்தை சேர்ந்தவர் வேலு(வயது 60).விவசாயி.இவர் தனது வயலில் எலித்தொல்லை அதிகமாக இருந்ததால், அதனை ஒழிப்பதற்காக மின்வேலி அமைத்ததாக கூறப்படுகிறது. அதே பகுதியை சேர்ந்தவர் குமார்(45).விவசாயி. வேலுவின் பக்கத்து வயலை சேர்ந்தவர்.

குமார் தனது வயலை சுற்றிப்பார்க்க சென்றபோது மின்வேலி அமைத்தது தெரியாமல் அதனை தொட்டார். மின்வேலியில் சிக்கிய குமார் அதே இடத்தில் பரிதாபமாக உயிரிழந்தார்.

இது குறித்து கிராம நிர்வாக அதிகாரி முருகன் உத்திரமேரூர் போலீசாருக்கு தகவல் தெரிவித்தார். அதன் பேரில் போலீசார் சம்பவ இடத்திற்கு விரைந்து சென்று குமாரின் உடலை கைப்பற்றி பிரேத பரிசோதனைக்காக செங்கல்பட்டு அரசு ஆஸ்பத்திரிக்கு அனுப்பி வைத்தனர்.

மேலும் இது குறித்து போலீசார் வழக்குப்பதிவு செய்து விசாரணை நடத்தி வருகின்றனர்.