நடுரோட்டில் கார் கவிழ்ந்தது; பெண் உள்பட 3 பேர் படுகாயம்

குலசேகரன்பட்டினம்,

தட்டார்மடம் அருகே உள்ள பள்ளக்குறிச்சியைச் சேர்ந்தவர் தங்கமணி (வயது 42). விவசாயி. இவருடைய உறவினர் பொள்ளாச்சியில் இறந்து விட்டார். எனவே அந்த துக்க வீட்டுக்கு செல்வதற்காக, நேற்று முன்தினம் இரவில் தங்கமணி தனது காரில் அப்பகுதியைச் சேர்ந்த உறவினர்களுடன் புறப்பட்டார். குலசேகரன்பட்டினம் அருகே கல்லாமொழி பகுதியில் சென்றபோது திடீரென்று காரின் டயர் வெடித்தது. இதனால் நிலைதடுமாறிய கார் நடுரோட்டில் கவிழ்ந்தது.

இந்த விபத்தில் காரில் இருந்த முத்துராமன் (65), கஸ்தூரி (60), ராஜேஷ் (30) ஆகிய 3 பேரும் படுகாயம் அடைந்தனர். உடனே அவர்களுக்கு திருச்செந்தூர் அரசு ஆஸ்பத்திரியில் முதலுதவி சிகிச்சை அளித்து, மேல் சிகிச்சைக்காக தூத்துக்குடி அரசு ஆஸ்பத்திரியில் அனுமதித்தனர். அங்கு அவர்களுக்கு தீவிர சிகிச்சை அளிக்கப்படுகிறது.

இதுகுறித்த புகாரின்பேரில், குலசேகரன்பட்டினம் போலீசார் வழக்குப்பதிவு செய்து விசாரணை நடத்தி வருகின்றனர்.