பெட்ரோல் ஊற்றி, மாணவி உடலில் தீ வைத்த வாலிபர் கைது

திருமங்கலம்,

மதுரை மாவட்டம் திருமங்கலத்தை அடுத்த நடுவக்கோட்டையைச் சேர்ந்தவர், சந்தானம். இவருடைய மகன் பாலமுருகன் (வயது 23). திருமங்கலத்தில் உள்ள தனியார் நூற்பாலையில் கூலித்தொழிலாளியாக வேலை பார்த்து வரும் இவர், அதே பகுதியைச் சேர்ந்த 9-ம் வகுப்பு படிக்கும் ஒரு மாணவியை கடந்த 6 மாதங்களாக ஒருதலையாக காதலித்து வந்தார்.

அவரை பலமுறை எச்சரித்தும் கேட்காததால், மாணவியின் பெற்றோர் திருமங்கலம் மகளிர் போலீசில் புகார் அளித்தனர். போலீசார் விசாரணை நடத்தி, பாலமுருகனை அழைத்து எச்சரித்து அனுப்பினர்.

அதன்பிறகும் பாலமுருகன் அந்த மாணவிக்கு தொந்தரவு கொடுத்து வந்தார்.

இந்த நிலையில் அந்த மாணவி நேற்றுமுன்தினம் மாலை பள்ளி முடிந்து வீடு திரும்புவதற்காக, பஸ் நிறுத்தத்தில் நின்றிருந்தார். அப்போது அங்கு வந்த பாலமுருகன் திடீரென பெட்ரோலை எடுத்து மாணவி மீது ஊற்றி தீ வைத்து விட்டு தப்பி விட்டார்.

அதில் உடல் முழுவதும் வெந்து, உயிருக்கு ஆபத்தான நிலையில் அந்த மாணவி மதுரை ராஜாஜி அரசு மருத்துவமனையில் சிகிச்சை பெற்று வருகிறார்.

இதுகுறித்து திருமங்கலம் தாலுகா போலீசார் வழக்குப்பதிவு செய்து தப்பி ஓடிய பாலமுருகனை தேடி வந்தனர்.

நேற்றுமுன்தினம் நள்ளிரவு ஊருக்கு அருகே உள்ள காட்டுப் பகுதியில் பாலமுருகன் பதுங்கி இருந்தது தெரியவந்தது. அவரை போலீசார் கைது செய்தனர்.

அப்போது அவரது கையில் தீக்காயம் ஏற்பட்டு இருந்தது தெரியவந்தது. மாணவி மீது பெட்ரோல் ஊற்றி தீவைத்த போது தன் கையிலும் தீக்காயம் ஏற்பட்டது என்று அவர் தெரிவித்தார்.

மேலும், ஒரு தலைக்காதலால் மாணவியின் பின்னால் சுற்றியதாகவும், இதை ஊரார் கண்டித்ததுடன், பெண்ணின் பெற்றோர் போலீசில் புகார் செய்ததால் ஆத்திரம் அடைந்து, மாணவியை பழி தீர்க்க எண்ணி பெட்ரோல் ஊற்றி தீ வைத்ததாகவும் அவர் போலீசாரிடம் தெரிவித்தார்.

போலீசார் பாலமுருகனை மதுரை ராஜாஜி அரசு மருத்துவமனைக்கு அழைத்துச்சென்றனர். அங்கு அவரது தீக்காயத்துக்கு சிகிச்சை அளிக்கப்பட்டது.

இதற்கிடையே, ஆஸ்பத்திரியில் அனுமதிக்கப்பட்டுள்ள மாணவியின் உடல்நிலை தொடர்ந்து ஆபத்தான நிலையில் உள்ளது. அவருக்கு டாக்டர்கள் தீவிர சிகிச்சை அளித்து வருகிறார்கள்.

திருமங்கலம் பகுதியில், காதல் தகராறில் சில ஆண்டுகளுக்கு முன், கல்லூரி மாணவி மீது திராவகம் வீசிய சம்பவம் நடந்தது.

தற்போது, பள்ளி மாணவி மீது பெட்ரோல் ஊற்றி தீவைத்த கொடிய சம்பவம் நடந்துள்ளது குறிப்பிடத்தக்கது.