பல்லடத்தில் லாரி மோதி போலீஸ் நண்பர்கள் குழு வாலிபர் பலி; சப்-இன்ஸ்பெக்டர் படுகாயம்

பல்லடம்,

பல்லடம் பாவேந்தர் வீதியை சேர்ந்த கிருஷ்ண சாமியின் மகன் ஜெகதீஸ்(வயது 18). இவர் பல்லடத்தில் உள்ள ஒரு தனியார் டுட்டோரியல் கல்லூரியில் 10-ம் வகுப்பு படித்து வந்தார். அத்துடன் பல்லடம் போலீஸ் நண்பர்கள் குழுவில் இணைந்து கடந்த 3 ஆண்டுகளாக சேவையாற்றி வந்தார்.

மேலும், இவர் இரவு நேரங்களில் பல்லடம் போலீசாருடன் இணைந்து ரோந்து பணியிலும் ஈடுபடுவது வழக்கம். அதன்படி நேற்று முன்தினம் இரவு பல்லடம் போலீஸ் நிலையத்தில் பணியாற்றி வரும் போலீஸ் சப்-இன்ஸ்பெக்டர் சந்திரன் என்பவருடன் இவர் ரோந்து பணியில் ஈடுபட்டிருந்தார்.

இதற்காக நேற்று முன்தினம் இரவு 10.20 மணி அளவில் ஒரு மோட்டார்சைக்கிளில் சப்-இன்ஸ்பெக்டர் சந்திரனுடன் ஜெகதீஸ் சென்றார். சப்-இன்ஸ்பெக்டர் மோட்டார்சைக்கிளை ஓட்ட ஜெகதீஸ் பின்னால் உட்கார்ந்து இருந்தார். பல்லடம் நால்ரோடு அருகே சென்றபோது பின்னால் வந்த ஒரு லாரி அவர்கள் மோட்டார்சைக்கிள் மீது எதிர்பாராத விதமாக மோதியது.

இதில் இருவரும் தூக்கி வீசப்பட்டு படுகாயம் அடைந்தனர். அங்கிருந்தவர்கள் இருவரையும் மீட்டு உடனடியாக சிகிச்சைக்காக பல்லடம் அரசு ஆஸ்பத்திரிக்கு கொண்டு சென்றனர். அங்கு இருவருக்கும் தீவிர சிகிச்சை அளிக்கப்பட்டது. இருப்பினும் சிகிச்சை பலனின்றி ஜெகதீஸ் பரிதாபமாக இறந்தார்.

போலீஸ் சப்-இன்ஸ்பெக்டர் சந்திரன் மேல் சிகிச்சைக்காக கோவையில் உள்ள தனியார் மருத்துவமனையில் சேர்க்கப்பட்டுள்ளார். அங்கு அவருக்கு தீவிர சிகிச்சை அளிக்கப்பட்டு வருகிறது.

மேலும் இதுகுறித்த புகாரின் பேரில் பல்லடம் போலீசார் வழக்குப்பதிவு செய்து விசாரணை நடத்தி வருகிறார்கள்.