ஜெயங்கொண்டம் அரசு மருத்துவமனை தரம் உயர்த்தப்படுமா?

வாரியங்காவல்,

அரியலூர் மாவட்டம் ஜெயங்கொண்டம் அரசு மருத்துவமனையில், ஜெயங்கொண்டம் உள்பட அதன்சுற்றுவட்டார கிராமங்களை சேர்ந்த பொதுமக்கள் பலர் மருத்துவ சேவையை பெற்று செல்கின்றனர். ஒரு நாளைக்கு 1,000-க்கும் மேற்பட்டோர் காய்ச்சல், விஷக்கடி, இருமல் மற்றும் விபத்தில் ஏற்பட்ட காயங்கள் உள்ளிட்டவற்றுக்கு புறநோயாளிகளாக சிகிச்சை பெற்று செல்கின்றனர். இத்தனை சிறப்பு வாய்ந்த இந்த மருத்துவமனை முதலில் ஓட்டு கட்டிடத்தில் ஆரம்பிக்கப் பட்டது.

அதன்பிறகு இதனை இடித்து விட்டு அப்போதைய சூழ்நிலைக்கு ஏற்றவாறு தரம் உயர்த்தி கான்கிரீட் கட்டிடம் 1971-ல் கட்டப்பட்டது. இந் நிலையில் 47 ஆண்டுகள் ஆகியும் மருத்துவமனை தரம் உயர்த்தப்படாமல் 148 படுக்கை வசதிகள் மற்றும் குறைவான மருத்துவர்களை மட்டுமே கொண்டு இன்று வரை இயங்கி வருகிறது.

பெருகி வரும் மக்கள் தொகைக்கு ஏற்ப ஜெயங்கொண்டம் அரசு மருத்துவ மனைக்கு புதிய கட்டிடம் கட்டி விரிவுபடுத்தப்படாததால் போதிய படுக்கை வசதியில்லாமல் உள்நோயாளிகள் கடும் சிரமத்திற்கு ஆளாகி வருகின்றனர். மேலும் போதிய மருத்துவர்கள், மருந்தாளுநர்கள், ஆர்த்தோ மருத்துவர்கள், செவிலியர்கள், கண் மருத்துவர்கள், குழந்தை நல மருத்துவர், மயக்க நல மருத்துவர், ஆய்வக நுட்புநர் இல்லை. மருத்துவ உபகரணங்கள், அதிநவீன தொழில்நுட்ப கருவிகள், ரத்த ஆய்வகம், சி.டி.ஸ்கேன், குடல் உள் நோக்கி கருவி, பிணவறையில் குளிர்சாதன பெட்டி உள்ளிட்டவைகளும் இல்லை.

விபத்து உள்ளிட்டவற்றில் சிக்கி உயிருக்கு ஆபத்தான நிலையில் சிகிச்சைக்காக கொண்டுவரப்படுவோரை மேல்சிகிச்சைக்காக தஞ்சாவூர், திருச்சி அரசு மருத்துவ மனைகளுக்கு அனுப்பி வைக்க வேண்டிய சூழ்நிலை உள்ளது. இதனால் அங்கு கொண்டுசெல்வதற்குள் அவர்கள் இறந்து விடுகின்றனர். மேலும் மருத்துவமனையின் கட்டிடங்கள் எப்போது வேண்டுமானாலும் இடிந்து விழும் ஆபத்தான நிலையில் உள்ளது.

கட்டிடத்தின் மேற்கூரையில் சிமெண்டு பூச்சுகள் பெயர்ந்து கம்பிகள் வெளியே தெரிகின்றன. எனவே மருத்துவமனை கட்டிடத்தை புனரமைக்க வேண்டும். மேலும் புதிய கட்டிடங்களை கட்டி மருத்துவமனையை விரிவுபடுத்த வேண்டும். நவீன உபகரணங்களுடன் மருத்துவமனையை தரம் உயர்த்த நடவடிக்கை எடுக்கப் படுமா? என்ற எதிர்பார்ப்பில் பொதுமக்கள் மற்றும் சமூக ஆர்வலர்கள் உள்ளனர்.