ஆம்பூர் அருகே தோல் தொழிற்சாலையில் விஷவாயு தாக்கி 3 தொழிலாளர்கள் சாவு

விஷவாயு தாக்கி இறந்த 3 பேரில் செல்வம், கோதண்டன் ஆகிய 2 பேருக்கும் இன்னும் திருமணம் ஆகவில்லை. 2 பேரின் வீட்டில் அவர்களுக்கு பெண் பார்த்து அடுத்த மாதம் திருமணம் நடக்க இருந்ததாக தெரிகிறது. திருமணத்திற்கு முன்பே 2 பேரும் இறந்துள்ளதால் உறவினர்கள் கதறி, கதறி அழுதனர்.

இவர்களில் செல்வம் சில மாதங்களுக்கு முன்புதான் வேலைக்கு சேர்ந்துள்ளார். அவரை சில மாதத்திலேயே தொழிற்சாலை நிர்வாகம் கழிவுநீர் தொட்டியில் சுத்தம் செய்ய இறக்கியது எப்படி என்று தெரியவில்லை. அவருக்கு தகுந்த பயிற்சி, பாதுகாப்பு உபகரணம் போன்ற எதுவும் வழங்கவில்லை என கூறப்படுகிறது.

விஷ வாயு தாக்கி பலியான 3 தொழிலாளர்களின் குடும்பத்திற்கு இழப்பீடு வழங்கக்கோரி அவர்களின் உறவினர்கள் தொழிற்சாலையின் கதவை மூடி போராட்டத்தில் ஈடுபட்டனர்.

விஷவாயு தாக்கி 3 பேர் இறந்த தகவல் அறிந்ததும் சகதொழிலாளர்களும், 3 பேரின் குடும்பத்தினர், உறவினர்கள் மற்றும் பொதுமக்கள் பதற்றத்துடன் தொழிற்சாலைக்கு வந்தனர். 3 பேரின் உடலை பார்த்து அவர்கள் கதறி அழுதனர். அதைத்தொடர்ந்து 3 பேரின் உடலையும் பிரேத பரிசோதனைக்கு ஆம்பூர் அரசு ஆஸ்பத்திரிக்கு அனுப்ப போலீசார் வேனில் ஏற்றினர்.

அப்போது 3 பேரின் சாவுக்கு உரிய நடவடிக்கை எடுக்க வேண்டும், அவர்களின் குடும்பத்தினருக்கு தொழிற்சாலை நிர்வாகம் தகுந்த இழப்பீடு வழங்க வேண்டும், அதுவரை உடலை இங்கிருந்து எடுத்து செல்லக்கூடாது என கூறி தொழிற்சாலையின் கதவுகளை இழுத்து மூடி போராட்டத்தில் ஈடுபட்டனர். அவர்கள் ஆம்புலன்சையும் செல்லவிடாமல் முற்றுகையிட்டனர். அப்போது அங்கு வந்த ஒரு மூதாட்டி தனது பேரனின் உடலை பார்த்து மயக்கம் போட்டு விழுந்தார். இதனால் சிறிது நேரம் பரபரப்பு ஏற்பட்டது.

அதைத்தொடர்ந்து வருவாய்துறையினரும், ஆம்பூர் துணை போலீஸ் சூப்பிரண்டு (பொறுப்பு) பிரகாஷ் பாபு மற்றும் போலீசாரும் போராட்டம் நடத்தியவர்களிடம் தொடர்ந்து பேச்சுவார்த்தை நடத்தி வருகின்றனர். மேலும் இச்சம்பவம் தொடர்பாக உமராபாத் போலீசார் வழக்குப்பதிவு செய்து விசாரணை நடத்தி வருகின்றனர்.