பெரியபாளையம் அருகே மொபட் மீது லாரி மோதல்; பெண் பலி கணவர் படுகாயம்

பெரியபாளையம்,

திருவள்ளூர் மாவட்டம் பெரியபாளையம் அடுத்த ஆரணி அத்திக்குளம் தெருவைச் சேர்ந்தவர் ஹரிபிரசாத்(வயது 55). இவர், சொந்தமாக கைத்தறி நெசவு செய்யும் தொழிற்சாலை வைத்து உள்ளார். இவருடைய மனைவி கமலம்மாள்(48). இவர்களுக்கு திவ்யா(30) என்ற மகளும், திலீப்(28) என்ற மகனும் உள்ளனர்.

மகள் திவ்யாவுக்கு ஏற்கனவே திருமணம் ஆகிவிட்டது. கடந்த 6 மாதங்களுக்கு முன்புதான் மகன் திலீப்புக்கு திருமணம் நடைபெற்றது. ஹரிபிரசாத் வீட்டின் வாஸ்து சரியில்லை என்று ஜோதிடர் ஒருவர் கூறியதால், சுமார் ரூ.3 லட்சம் செலவு செய்து வீட்டின் கதவு உள்ளிட்ட பகுதிகளை சீரமைத்துள்ளார்.

லாரி மோதியது

இந்தநிலையில் தனது குடும்ப பிரச்சினைகள் குறித்து பேசி ஆறுதல் பெறுவதற்காக ஹரிபிரசாத், தனது மனைவி கமலம்மாளுடன் தனது குடும்ப நண்பரான குமரப்பேட்டை ஊராட்சிக்கு உட்பட்ட காமாட்சி நகரில் வசித்து வரும் முன்னாள் ஊராட்சிமன்ற தலைவரான குமார் என்பவர் வீட்டுக்கு நேற்று காலை மொபட்டில் சென்றார்.

பின்னர் மாலையில் இருவரும் ஆரணிக்கு புறப்பட்டனர். காமாட்சி நகரில் இருந்து பெரியபாளையம்-புதுவாயல் சாலையில் ஆரணி நோக்கி திரும்பினர். அப்போது புதுவாயலில் இருந்து பெரியபாளையம் நோக்கி சென்ற லாரி ஒன்று கண் இமைக்கும் நேரத்தில் மொபட் மீது மோதியது.

மனைவி பலி

இதில் சாலையில் தூக்கி வீசப்பட்ட கமலம்மாள், தலையில் பலத்த காயம் அடைந்து அதே இடத்தில் ரத்த வெள்ளத்தில் துடிதுடித்து பரிதாபமாக இறந்தார். படுகாயம் அடைந்து உயிருக்கு போராடிய ஹரிபிரசாத்தை அருகில் இருந்தவர்கள் மீட்டு சென்னை ஸ்டான்லி அரசு ஆஸ்பத்திரியில் சேர்த்தனர். அங்கு அவர் தீவிர சிகிச்சை பெற்று வருகிறார்.

விபத்து நடந்த உடன் லாரியை அங்கேயே நிறுத்தி விட்டு டிரைவர் தப்பி ஓடிவிட்டார். இதில் மொபட்டின் முன்பகுதி நொறுங்கியது. பலியான கமலம்மாள் உடலை பார்த்து அவருடைய மகன் திலீப் மற்றும் உறவினர்கள் கதறி அழுதனர். விபத்து நடந்த இடத்தில் பொதுமக்கள் திரண்டு இருந்ததால் பெரியபாளையம்-புதுவாயல் சாலையில் சுமார் ஒரு மணி நேரம் போக்குவரத்து பாதிக்கப்பட்டது.

சம்பவ இடத்துக்கு சென்ற பெரியபாளையம் போலீசார், பலியான கமலம்மாள் உடலை மீட்டு பிரேத பரிசோதனைக்காக திருவள்ளூர் அரசு ஆஸ்பத்திரிக்கு அனுப்பி வைத்தனர். பின்னர் போக்குவரத்தை சீரமைத்தனர். மேலும் விபத்தை ஏற்படுத்திய லாரியை பறிமுதல் செய்த போலீசார், இதுபற்றி வழக்குப்பதிவு செய்து தப்பி ஓடிய லாரி டிரைவரை தேடி வருகின்றனர்.