கொருக்குப்பேட்டையில் வீட்டின் பூட்டை உடைத்து நகை, பணம் திருட்டு

பெரம்பூர், 

சென்னை கொருக்குப்பேட்டை காரோ நகரை சேர்ந்தவர் தீனதயாளன் (வயது 30). இவர் தனியார் நிறுவனம் ஒன்றில் வேலை பார்த்து வருகிறார். இவர் 2 நாட்களுக்கு முன்பு வீட்டை பூட்டி விட்டு, மனைவியுடன் சென்னை அரும்பாக்கத்தில் உள்ள மாமியார் வீட்டுக்கு சென்றார். நேற்று காலை அவர்கள் வீடு திரும்பினர். அப்போது, வீட்டில் இருந்த பீரோ உடைக்கப்பட்டு, அதில் இருந்த 5 பவுன் நகை மற்றும் ரூ.10 ஆயிரம் திருடுபோயிருப்பதை கண்டு அதிர்ச்சி அடைந்தனர். வீட்டின் மாடியில் உள்ள அறையின் பூட்டை உடைத்து, அந்த வழியாக வீட்டுக்குள் நுழைந்த மர்ம ஆசாமிகள் நகை, பணத்தை திருடி சென்றது தெரியவந்தது.

இதுகுறித்து தீனதயாளன் ஆர்.கே.நகர் போலீசில் புகார் அளித்தார். அதன் பேரில் போலீசார் வழக்குபதிவு செய்து விசாரித்து வருகிறார்கள்.