ராபர்ட்சன்பேட்டை டவுனில் துணிகரம் வீட்டின் பூட்டை உடைத்து ரூ.5 லட்சம் நகைகள், பணம் திருட்டு

கோலார் தங்கவயல்,

ராபர்ட்சன்பேட்டை டவுனில், வீட்டின் பூட்டை உடைத்து ரூ.5 லட்சம் மதிப்பிலான தங்க நகைகள், ரொக்கப்பணம் ஆகியவற்றை திருடிச்சென்ற மர்ம நபர்களை போலீசார் வலைவீசி தேடிவருகிறார்கள்.

கோலார் மாவட்டம், கோலார் தங்கவயல் ராபர்ட்சன்பேட்டை டவுன் விவேக் நகர் பகுதியில் வசித்து வருபவர் துர்கா. இவர் நேற்று முன்தினம் தனது வீட்டை பூட்டிவிட்டு மாரிக்குப்பம் பகுதியில் உள்ள உறவினர் வீட்டுக்கு சென்றுவிட்டார். நேற்று காலையில் வீடு திரும்பினார். அப்போது வீட்டின் முன்பக்க கதவின் பூட்டு உடைக்கப்பட்டு கதவு திறந்து கிடந்தது.

இதனால் அதிர்ச்சி அடைந்த அவர் வீட்டிற்குள் சென்று பார்த்தார். அப்போது வீட்டில் உள்ள பொருட்கள் சிதறிக்கிடந்தன. அனைத்து அறைகளின் கதவுகளும் திறந்து கிடந்தன. பீரோ உடைக்கப்பட்டு திறந்து கிடந்தது. அதில் இருந்த தங்க நகைகள் மற்றும் பணம் ஆகியவற்றையும் காணவில்லை. யாரோ மர்ம நபர்கள் வீட்டின் பூட்டை உடைத்து உள்ளே புகுந்து பீரோவில் இருந்த ரூ.5 லட்சம் மதிப்பிலான தங்க நகைகள் மற்றும் ரொக்கப்பணத்தை திருடிச்சென்றுவிட்டது தெரிய வந்தது.

இதனால் அதிர்ச்சி அடைந்த துர்கா இதுபற்றி ராபர்ட்சன்பேட்டை போலீசில் புகார் செய்தார். அதன்பேரில் போலீசார் சம்பவ இடத்திற்கு விரைந்து வந்து பார்வையிட்டனர். மேலும் அங்கிருந்த தடயங்களையும் பதிவு செய்து கொண்டனர். மோப்ப நாய் வரவழைக்கப்பட்டது. அது சம்பவம் நடந்த இடத்தில் இருந்து சிறிது தூரம் ஓடி நின்றுவிட்டது. ஆனால் யாரையும் கவ்விப்பிடிக்கவில்லை.

இதையடுத்து போலீசார் தாங்கள் கைப்பற்றிய தடயங்களை ஆய்வுக்காக தடய அறிவியல் பிரிவினருக்கு அனுப்பி வைத்தனர். மேலும் இதுகுறித்து போலீசார் வழக்குப்பதிவு செய்து துர்காவின் வீட்டில் கைவரிசை காட்டிய மர்ம நபர்களை வலைவீசி தேடிவருகிறார்கள்.