திருப்பரங்குன்றம் அருகே லாரிகள் நேருக்கு நேர் மோதல்; டிரைவர் பலி

திருப்பரங்குன்றம்,

விருதுநகர் மாவட்டம் வத்ராயிருப்பு அருகே உள்ள கோட்டையூரை சேர்ந்தவர் கருப்பையா. இவருடைய மகன் ராஜபாண்டி (வயது 21).லாரி டிரைவரான இவர் திருப்பூரில் இருந்து மதுரை சிந்தாமணிக்கு துணிகள் ஏற்றிய லாரியை ஓட்டி வந்தார். மதுரை எம்.ஜி.ஆர். பஸ்நிலையத்தில் இருந்து கியாஸ் நிரப்பிய சிலிண்டர்களை ஏற்றிய லாரி ராஜபாளையத்திற்கு சென்றது.

இந்த லாரியை திருச்சி மாவட்டம் மணப்பாறையை சேர்ந்த டிரைவர் சரவணன்(35) என்பவர் ஓட்டி வந்தார். திருப்பரங்குன்றம் அருகே உள்ள கருவேலம்பட்டி நான்கு வழிச்சாலையில் வந்த போது எதிர்பாராத விதமாக 2 லாரிகளும் நேருக்கு நேர் மோதிக் கொண்டன.

இதில் துணி ஏற்றி வந்த லாரி டிரைவர் ராஜபாண்டி சம்பவ இடத்திலேயே பரிதாபமாக பலியானார். மற்றொரு லாரி டிரைவரான சரவணன் பலத்த காயமடைந்து திருமங்கலம் அரசு மருத்துவ மனையில் சேர்க்கப்பட்டு சிகிச்சை பெற்று வருகிறார். இந்த விபத்து குறித்து ஆஸ்டின்பட்டி போலீசார் வழக்கு பதிவு செய்து விசாரணை நடத்தி வருகின்றனர்.