ஆலங்குளம் அருகே பரிதாபம் மின்னல் தாக்கி விவசாயி பலி

கடையம், 

ஆலங்குளம் அருகே மின்னல் தாக்கி விவசாயி பலியானார். அவரது உடலை பார்த்து குடும்பத்தினர் கதறி அழுதனர்.

நெல்லை மாவட்டம் ஆலங்குளம் அருகே உள்ளது கீழகுத்தப்பாஞ்சான் கிராமம். இந்த ஊரைச் சேர்ந்தவர் மிக்கேல் (வயது 58), விவசாயி. இவர் நேற்று மாலை அங்குள்ள காட்டுப்பகுதியில் ஆடு மேய்த்துக்கொண்டு இருந்தார். அப்போது இடி-மின்னலுடன் பலத்த மழை பெய்தது.

திடீரென்று மிக்கேலை மின்னல் தாக்கியது. இதில் உடல் கருகிய அவர் சம்பவ இடத்திலேயே துடிதுடித்து பரிதாபமாக இறந்தார். தகவல் அறிந்தவுடன் அந்த ஊர் மக்கள் திரண்டு வந்தனர். மிக்கேல் உடலை பார்த்து குடும்பத்தினர் கதறி அழுதனர். இது அங்கிருந்தவர்களை கண்கலங்க செய்தது.

தகவல் அறிந்த கடையம் போலீசார் சம்பவ இடத்துக்கு விரைந்து வந்து மிக்கேல் உடலை மீட்டு பிரேத பரிசோதனைக்கு அம்பை அரசு ஆஸ்பத்திரிக்கு அனுப்பி வைத்தனர். இதுகுறித்து கடையம் போலீசார் வழக்குப்பதிவு செய்து விசாரணை நடத்தினர். மின்னல்தாக்கி விவசாயி பலியான சம்பவம் அந்த பகுதியில் சோகத்தை ஏற்படுத்தியது. இதற்கிடையே அதே பகுதியை சேர்ந்த மாசிலாமணி என்பவருக்கு சொந்தமான பசு மாடு ஒன்றும் மின்னல் தாக்கி இறந்தது.