பெற்ற குழந்தையை காலால் மிதித்து கொன்ற பெண் கைது

சென்னை செனாய்நகர் குடிசைமாற்று வாரிய குடியிருப்பு ‘எப்’ பிளாக்கை சேர்ந்தவர் பிரியங்கா (வயது 22). இவர் தனது 14-வது வயதிலேயே வேலு என்ற பெயிண்டரை காதலித்து திருமணம் செய்துகொண்டார். வேலு வழக்கு ஒன்றில் கைது செய்யப்பட்டு சிறையில் அடைக்கப்பட்டார்.

அதன்பிறகு தனியாக வாழ்ந்த பிரியங்கா அதே பகுதியை சேர்ந்த தினேஷ்குமார் என்ற வாலிபரோடு குடும்பம் நடத்தினார். அவர்களுக்கு ஸ்ரீமதி (வயது 3), புஷ்பம் (1½) என்ற பெண் குழந்தைகள் பிறந்தன. பிரியங்காவின் வாழ்க்கையில் மீண்டும் விதி விளையாட ஆரம்பித்தது. அவரது 2-வது கணவர் தினேஷ்குமாரும் வழக்கு ஒன்றில் கைதாகி சிறை சென்றார்.

இந்நிலையில் சிறையில் இருந்து விடுதலையாகி வந்த முதல் கணவர் வேலுவுடன், பிரியங்கா தற்போது சேர்ந்து வாழ்ந்து வந்தார். வேலுவும், அவருடன் சேர்ந்து பிரியங்காவும் மது அருந்துவார்களாம். போதையில் இருவரும் சேர்ந்து குழந்தைகளை அடித்து உதைப்பது வழக்கம். நேற்று முன்தினம் இரவு போதையில் இருந்த அவர்களுக்குள் தகராறு ஏற்பட்டது. பிரியங்கா பரிமாறிய பிரியாணி ருசியாக இல்லை என்று வேலு சண்டைபோட்டார்.

அந்த சண்டையால் ஏற்பட்ட கோபத்தில் பிரியங்கா குழந்தை மீது பாயத்தொடங்கினார். தனது 2-வது குழந்தை புஷ்பத்தை கீழே தள்ளி காலால் மிதித்ததாகவும் கூறப்படுகிறது. அதில் குழந்தையின் மூக்கு, வாயில் இருந்து ரத்தம் வடிந்தது. உடனே குழந்தைக்கு வயிற்று வலி என்றும், அதற்கு மருந்து கொடுத்ததால் மூக்கு, வாயில் ரத்தம் வடிகிறது என்று பொய்யான தகவலை கூறி குழந்தையை நேற்று முன்தினம் இரவு கீழ்ப்பாக்கம் அரசு ஆஸ்பத்திரியில் சேர்த்தனர்.

ஆனால் குழந்தை புஷ்பம் பரிதாபமாக இறந்துபோனது. டி.பி.சத்திரம் போலீசாரிடமும் அதேபோல பொய்யான தகவலை கொடுத்தனர். ஆனால் டாக்டர்கள் குழந்தையின் உடலில் காயங்கள் இருப்பதாகவும், எலும்பு முறிவு ஏற்பட்டுள்ளது என்றும், குழந்தையின் சாவில் சந்தேகம் இருப்பதாகவும் போலீசுக்கு தகவல் கொடுத்தனர்.

நேற்று புஷ்பத்தின் உடல் பிரேத பரிசோதனை செய்யப்பட்டதில் குழந்தை கொலை செய்யப்பட்டு இருப்பது தெரியவந்தது. இதையடுத்து கீழ்ப்பாக்கம் துணை கமிஷனர் ராஜேந்திரன் உத்தரவின் பேரில் டி.பி.சத்திரம் இன்ஸ்பெக்டர் தயாள் அதிரடி விசாரணை நடத்தினார்.

விசாரணையில் குழந்தை புஷ்பத்தை காலால் மிதித்ததை பிரியங்கா ஒப்புக்கொண்டார். இதனால் கொலை வழக்கில் பிரியங்காவும், கொலைக்கு உடந்தையாக இருந்ததாக வேலுவும் நேற்று இரவு கைது செய்யப்பட்டனர்.

பெற்ற குழந்தையை தாயே மிதித்து கொன்ற சம்பவம் டி.பி.சத்திரம், செனாய்நகர் பகுதிகளில் நேற்று பெரும் பரபரப்பை ஏற்படுத்தியது.