எல்லாவற்றையும் பகிர்ந்து கொண்டால் ஏமாற்றங்கள் ஏராளம்..

 எந்தவொரு விஷயத்தையும் முன் பின் தெரியாதவர்களோடு பகிர்ந்துகொள்ள முடிகிறது. அவர்களின் கருத்துகளையும் அறிந்து கொள்வதோடு தங்களது ஆட்சேபனைகளையும் தெரிவிக்க முடிகிறது. அந்த அளவிற்கு சமூகவலைத்தளங்கள் சமூகத்தின் தவிர்க்க முடியாத சக்தியாக உருவெடுத்துக்கொண்டிருக்கிறது.

‘ஒருவருக்கொருவர் கருத்து பரிமாறிக் கொள்ளலாம். முக்கியச் செய்திகளை உடனுக்குடன் தெரிவித்துக் கொள்ளலாம், ஒரே நேரத்தில் பலருக்கு தகவல் பரிமாற்றம் செய்யலாம். பண உதவி, அவசர உதவி, ரத்ததானம் என எந்தவொரு உதவியாக இருந்தாலும் நொடிப்பொழுதில் சமூக வலைத்தளம் மூலம் தொடர்பு கொண்டு நிறை வேற்றிவிடலாம்’ என நவீன தொழில்நுட்பங்களின் வரப்பிரசாதமாக சமூக வலைத்தளங்கள் கோலோச்சிக்கொண்டிருக்கின்றன. அதனை நாம் நல்லவிதமாக பயன்படுத்திக் கொண்டால் கிடைக்கும் நன்மைகள் ஏராளம்.



நம்மைப் பற்றி நம் குடும்பத்தை பற்றி பொது இடத்தில் பேசினால் நன்றாகவா இருக்கும்? அதைப் போல தான் இதுவும். எல்லோருக்கும் நல்ல எண்ணங்கள் தோன்றாது. சைபர் கிரைம்கள் உருவாக இது போன்ற தகவல் பரிமாற்றங்கள் வழி வகுக்கிறது. இதனைத் தடுக்க மக்களிடையே போதுமான விழிப்புணர்வு தேவை என்கிறார்கள் சமூக ஆர்வலர்கள்.

மனோரீதியாக இதற்குச் சொல்லப்படும் காரணங்கள் பல. எந்த ஒரு விஷயத்தையும் நேரில் சொல்ல தயங்குபவர்கள் கூட இப்படி சமூகவலைத்தள குழுக்கள் மூலம் சொல்லிவிடுகிறார்கள். மற்றவர்கள் பதிவு செய்யும் விஷயங்களுக்கு இணையாக தங்கள் வாழ்வில் நடந்த சுவாரசியமான ஒன்றைப் பகிர்ந்து கொள்ள விரும்புகிறார்கள். மனதில் பூட்டிவைத்திருந்த ஒரு விஷயத்தை வெளிப்படையாக பகிர்ந்து கொள்வதால் மனம் ‘ரிலாக்ஸ்’ ஆவதாக உணர்கிறார்கள். அப்படி பகிர்ந்து கொள்வதால் பிரச்சினைகளுக்கு தீர்வு கிடைக்கும் என்று நினைக்கிறார்கள். தங்களுடைய எதிர்பார்ப்புக்கு மாறாக ஏதாவது நடந்து விட்டால் அதை எப்படி சரி செய்வது? என்று யாரும் யோசிப்பதில்லை.

இன்றைய காலகட்டத்தில் சமூக வலைத்தளங்களை ஒதுக்கிவிடமுடியாது. இயந்திரத்தனமாக ஓடோடி உழைத்துக்கொண்டிருப்பவர்கள் நண்பர்களிடம் ஆசுவாசமாக பேசுவதற்கான சூழல் உருவாகாதபோது மன அழுத்தத்தை போக்க சமூகவலைத்தள குழுக்கள் உதவு கிறது. அதை தேவைக்கு மட்டும் பயன்படுத்துவதில் கவனம் செலுத்த வேண்டும்.

தொழில் சம்பந்தமான விஷயங்கள், முக்கிய ஆலோசனைகள், சாதனைகள், மதிப்புரைகள், வாழ்த்துகள், பாராட்டுகள், சமூக மாற்றங்களைப் பற்றிய கருத்துக்கள் என்று பகிர்ந்து கொள்ள பல விஷயங்கள் இருக்கின்றன. மற்றவர்களைப் பற்றிய கருத்துகளை பகிர்ந்து கொள்ளும்போது சம்பந்தப்பட்டவர்கள் பார்க்க நேரிட்டால் அது அவர்களை மகிழ்ச்சிப்படுத்துவதாக அமைந்திருக்க வேண்டும். கருத்து மோதல்கள் உருவாக வழிவகுத்துவிடக்கூடாது. ஒரு விஷயத்தை நேருக்கு நேர் பகிர்ந்து கொள்வது வேறு, பலரோடு பகிர்ந்து கொள்வது வேறு. இரண்டுக்கும் பல வித்தியாசங்கள் இருக்கின்றன.

சமீபகால ஆய்வின் படி சமூகவலைத்தளங்கள் பல உறவுகளைப் பிரித்துள்ளது என்பது உறுதி செய்யப்பட்டுள்ளது. நவீனத் தொழில் நுட்பங்களால் பயனடையலாம். மாறாக அதை தவறாக பயன்படுத்தி சிக்கலில் மாட்டிக் கொள்ள கூடாது.

மின்சாரம் பயனுள்ளது தான். ஆனால் அதை எப்படி பயன்படுத்த வேண்டும் என்ற வரைமுறை இருக்கிறது. அதை மீறி பயன்படுத்தினால் உயிருக்கே உலை வைத்துவிடும். எல்லா தொழில் நுட்பமும் அப்படித்தான். ஒருபோதும் அவை மனித உணர்வுகளை பாதித்து விடக்கூடாது. அத்தகைய பாதிப்பு ஏற்பட்டால் எந்தத் தொழில் நுட்பத்தாலும் அதை சரி செய்ய முடியாது. அதிலும் குறிப்பாக பெண்கள். தங்களின் தனிப்பட்ட விஷயங்களை சமூக வலைத்தளங்களில் பகிர்வதை தவிர்க்க வேண்டும். இல்லாவிட்டால் அதுவே அவர் களின் பாதுகாப்புக்கு உலைவைத்துவிடும்.

சமூக வலைத்தளங்களின் சாதக, பாதக அம்சங்கள் குறித்து இந்தி திரையுலக நடிகர்-நடிகைகள் சொல்வதை கேட்போம்.

வித்யாபாலன்:

இவர் சமூக வலைத்தளத்தில் தனக்கென்று எந்த கணக்கும் வைத்துக் கொள்ளாதவர். அதற்கான காரணத்தை சொல் கிறார். ‘‘முன்பின் தெரியாதவர்களோடு நம் விஷயங்களை பகிர்ந்து கொள்வது எனக்கு பிடிக்காத விஷயம். அது வீண் வேலை. அதனால்தான் சமூக வலைத்தளத்தை பயன் படுத்துவதில்லை’’ என்கிறார்.

ஷ்ரத்தா கபூர்:

“எல்லா விஷயங்களிலும் நன்மை, தீமை இரண்டும் உள்ளது. அவசரமாக பணிக்கு செல்வோர், நாட்டு நடப்பை தெரிந்து கொள்ள முடியாதவர்களுக்கு சமூக வலைத்தளம் ஒரு வரப்பிரசாதம். ஒரே நேரத்தில் பலவற்றை தெரிந்துகொள்ளலாம். தொலைக்காட்சி சேனல்களை ஒவ்வொன்றாக திருப்பி விஷயங்களைத் தெரிந்து கொள்ள நேரம் இல்லாதவர்களுக்கு வலைத்தளம் உதவுகிறது. இதன் மூலம் வன்முறைகள் நடப்பதென்னவோ உண்மைதான். அதை மட்டும் தடுக்க என்ன வழி என்று பார்க்க வேண்டும்”

சோஹா அலிகான்:

“இருமுனை கத்தி போன்றது நவீன தொழில்நுட்பம். நானே பல நேரடி பாதிப்பு களுக்கு ஆளாகி இருக்கிறேன். எப்போதும் என்னால் கவனமாக இருக்க முடியாது. அதனால் வலைத்தளத்தில் எழுதுவதை நிறுத்திவிட்டேன். கூடுமானவரை வம்புகளிலிருந்து தப்பித்துக் கொள்ள இது ஒரு சுலபமான வழி. ‘நான் அவர்களைப் பற்றி பேசிவிட்டேன், இதை சொல்லி விட்டேன். அதை சொல்லி விட்டேன் என்ற மனவருத்தம் யாருக்கும் வேண்டாம்” என்கிறார்.

ப்ராச்சி தேசாய்:

“ரசிகர்களின் உடனடி கருத்தை தெரிந்துகொள்ள எனக்கு வலைத்தளம் பயன்படுகிறது. நம்முடைய குறை நிறைகளை உடனுக்குடன் அறிந்து கொள்ள முடிகிறது. ஒருசில தவறுகளை நாம் செய்யாமலிருக்க வேண்டும். எந்த ஒரு நன்மைக்கும் பின்னால் ஒரு தீமை ஒளிந்திருக்கும். இது தவிர்க்க முடியாதது. அணு சக்தியை கண்டுபிடித்த மனிதன்தான் அணுகுண்டையும் கண்டு பிடித்தான். ஒவ்வொரு நவீன தொழில் நுட்பமும் மனித வளர்ச்சியை காட்டுகிறது. ஆனால் அதில் அழிவு சக்தியும் அடங்கி இருக்கிறது. நல்லதை மட்டும் எடுத்துக் கொண்டு, தீயதை தவிர்த்து விட வேண்டும்”