ரம்ஜான் பண்டிகையையொட்டி பள்ளிவாசல்களில் சிறப்பு தொழுகை

தர்மபுரி,

முஸ்லிம் மக்களின் முக்கிய பண்டிகைகளில் ஒன்றான ரம்ஜான் பண்டிகை நாடு முழுவதும் நேற்று உற்சாகத்துடன் கொண்டாடப்பட்டது. இதையொட்டி தர்மபுரி மாவட்டத்தில் உள்ள பள்ளிவாசல்களில் நேற்று காலை சிறப்பு தொழுகை நடந்தது. இதையொட்டி பள்ளிவாசல்கள் வண்ண மின் விளக்குகளால் அலங்கரிக்கப்பட்டு இருந்தன. இதில் ஆயிரக்கணக்கான முஸ்லிம்கள் பங்கேற்று தொழுகை நடத்தினார்கள்.

தர்மபுரி நகர அனைத்து மசூதிகள் கூட்டமைப்பு சார்பில், தர்மபுரி-கிருஷ்ணகிரி மெயின்ரோட்டில் ராமக்காள் ஏரிக்கரையில் அமைந்துள்ள ஈத்கா மைதானத்தில் ரம்ஜான் பண்டிகையையொட்டி நேற்று காலை சிறப்பு தொழுகை நடந்தது. இதில் ஆயிரக்கணக்கான முஸ்லிம்கள் புத்தாடை அணிந்து பங்கேற்று தொழுகை நடத்தினார்கள்.

தொழுகையில் பங்கேற்ற இளைஞர்கள், சிறுவர்-சிறுமிகள் ஒருவரையொருவர் கட்டித்தழுவி ரம்ஜான் வாழ்த்துக்களை பரிமாறிக்கொண்டனர். பின்னர் ஏழை,எளிய மக்களுக்கு பல்வேறு உதவிகளை வழங்கினார்கள். சிறப்பு தொழுகைக்கான ஏற்பாடுகளை சங்க தலைவர் அப்துல்காதர், செயலாளர் இக்பால், பொருளாளர் நசீர், துணைத்தலைவர்கள் இப்ராகிம், நியாஸ், பாபு, மாவட்ட முத்தவல்லி தலைவர் ஜப்பார் மற்றும் நிர்வாகிகள் செய்து இருந்தனர்.

இதேபோல் பாலக்கோடு, பென்னாகரம், பாப்பிரெட்டிப்பட்டி, மொரப்பூர், நல்லம்பள்ளி, தொப்பூர், கம்பைநல்லூர், பொம்மிடி, மாரண்டஅள்ளி உள்ளிட்ட மாவட்டத்தின் அனைத்து பகுதிகளில் உள்ள மசூதிகள், பள்ளிவாசல்களில் ரம்ஜான் பண்டிகையையொட்டி சிறப்பு தொழுகை நடந்தது. இதில் திரளானோர் பங்கேற்றனர். தொழுகை நடைபெற்ற இடங்களில் போக்குவரத்தை சீரமைக்கும் பணி மற்றும் பாதுகாப்பு பணியில் போலீசார் ஈடுபட்டனர்.