தொழில் முனைவோருக்கு ரூ.5 கோடி வரை மானியத்துடன் கடன் உதவி கலெக்டர் சந்தீப் நந்தூரி தகவல்

தூத்துக்குடி, 

தூத்துக்குடி மாவட்டத்தில் முதல் தலைமுறை தொழில் முனைவோருக்கு ரூ.5 கோடி வரை மானியத்துடன் கடன் உதவி வழங்கப்பட உள்ளது என மாவட்ட கலெக்டர் சந்தீப் நந்தூரி தெரிவித்து உள்ளார்.

இதுகுறித்து அவர் வெளியிட்டுள்ள செய்திக்குறிப்பில் கூறி இருப்பதாவது;–

தூத்துக்குடி மாவட்டத்தில் முதல் தலைமுறை தொழில் முனைவோர் தொழில் தொடங்க ரூ.5 கோடி வரை மானியத்துடன் கடன் உதவி வழங்கப்பட உள்ளது. படித்த இளைஞர்களுக்கு தொழில் முனைவோர் பயிற்சியளித்து, அவர்களை முதல் தலைமுறை தொழில் முனைவோராக உருவாக்க வேண்டும் என்ற நோக்கத்தில் தமிழக அரசு, புதிய தொழில் முனைவோர் மற்றும் தொழில் நிறுவன மேம்பாட்டு திட்டத்தை மாவட்ட தொழில் மையம் மூலமாக செயல்படுத்தி வருகிறது. இந்த திட்டத்தில் இதுவரை ரூ.1 கோடி வரையாக இருந்த கடன் தொகையை 24.4.2018 முதல் ரூ.5 கோடியாக உயர்த்தி தமிழக அரசு ஆணையிட்டுள்ளது.

இந்த திட்டத்தின்கீழ் பட்டப்படிப்பு, பட்டய படிப்பு, ஐ.டி.ஐ மற்றும் அங்கீகரிக்கப்பட்ட பயிற்சி நிறுவனங்கள் மூலம் தொழில் பயிற்சி ஆகிய கல்வி தகுதி பெற்றிருப்பவர்கள் தேர்வு செய்யப்பட்டு பின்னர் வங்கிகள், தமிழ்நாடு தொழில் முதலீட்டு கழகம், தமிழ்நாடு தொழிற்கூட்டுறவு வங்கி மூலம் கடன் பெற வழிவகை செய்யப்படும்.

இந்த திட்டத்தில் பொது பிரிவினருக்கு வயது வரம்பு 21–க்கு மேல் 35–க்குள் இருக்க வேண்டும். சிறப்பு பிரிவினர்களான மகளிர், ஆதி திராவிடர், பழங்குடியினர், பிற்படுத்தப்பட்ட வகுப்பினர், மிகவும் பிற்படுத்தப்பட்ட வகுப்பினர், முன்னாள் ராணுவத்தினர், மாற்றுத்திறனாளிகள் ஆகியோருக்கு அதிகபட்சம் 45 வயது ஆகும். இந்த திட்டத்திற்கு ஆண்டு வருமானம் உச்ச வரம்பு ஏதுமில்லை.

இந்த திட்டத்தின்கீழ் திட்ட மதிப்பீடு ரூ.10 லட்சத்திற்கு மேல் அதிகபட்சம் ரூ.5 கோடி வரையிலான உற்பத்தி சார்ந்த தொழில்கள், சேவை சார்ந்த தொழில்கள் தொடங்கலாம். பொது பிரிவினர் 10 சதவீதமும், சிறப்பு பிரிவினர் 5 சதவீதமும் தங்களது பங்காக முதலீடு செய்ய வேண்டும். இந்த திட்டத்தின் கீழ் தொழில் தொடங்கும் தொழில் முனைவோருக்கு தொழிலின் திட்ட மதிப்பீட்டில் 25 சதவீதம் அதிகபட்சமாக ரூ.25 லட்சம் வரை முதலீட்டு மானியமும், 3 சதவீத வட்டி மானியமும் வழங்கப்படும்.

தமிழக அரசின் தொழில் முனைவோர் மேம்பாட்டு பயிற்சி நிறுவனம் மூலம் 15 நாட்கள் தொழில் முனைவோர் மேம்பாட்டு பயிற்சி வழங்கப்படும். கூட்டு நிறுவனமாக பதிவு செய்தால் அதாவது ஒன்றுக்கு மேற்பட்ட பங்குதாரராக இருந்தால் யாராவது ஒருவருக்கு மட்டும் பயிற்சி வழங்கப்படும். சிறப்பு பிரிவினரான பெண்களுக்கு இந்த திட்டத்தின் கீழ் 50 சதவீதம் ஒதுக்கீடு செய்யப்பட்டுள்ளது. மாவட்ட கலெக்டர் தலைமையிலான தேர்வு குழுவினரால் பயனாளிகள் தேர்வு செய்யப்படுவர்.

இந்த திட்டத்தின் கீழ் பயன் பெற விரும்புவோர் www.msmeonline.tn.gov.in/needs என்ற இணையதள முகவரியில் விண்ணப்பத்தை உரிய ஆவணங்களுடன் பதிவேற்றம் செய்ய வேண்டும். அவர்களது விண்ணப்பம் மாவட்ட தொழில் மையம் மூலம் இணையதளத்தில் சரிபார்க்கப்பட்டு நேர்முகத்தேர்விற்கு அழைக்கப்படுவர்.

மேலும் விவரங்களுக்கு ‘பொது மேலாளர், மாவட்ட தொழில் மையம், பைபாஸ் ரோடு சமீபம், தூத்துக்குடி’ என்ற முகவரியில் நேரில் அல்லது 0461–2340152 என்ற தொலைபேசி எண்ணில் தொடர்பு கொண்டு அறியலாம். ஆர்வமுள்ள தொழில் முனைவோர் இந்த திட்டத்தில் விண்ணப்பித்து பயன் பெறலாம்.

இவ்வாறு மாவட்ட கலெக்டர் சந்தீப் நந்தூரி தெரிவித்து உள்ளார்.