நாளை முதல் பிளஸ்-2 தேர்ச்சி பெற்றவர்கள் பள்ளிகளில் வேலை வாய்ப்பை பதிவு செய்யலாம்

கிருஷ்ணகிரி,

கிருஷ்ணகிரி மாவட்டத்தில் நாளை முதல் பிளஸ்-2 தேர்ச்சி பெற்ற மாணவர்கள் தாங்கள் பயின்ற பள்ளிகளில் வேலைவாய்ப்பை பதிவு செய்யலாம் என மாவட்ட நிர்வாகம் சார்பில் கூறப்பட்டுள்ளது.

இது குறித்து மாவட்ட நிர்வாகம் வெளியிட்டுள்ள செய்திக்குறிப்பில் கூறியிருப்பதாவது:-

10 மற்றும் பிளஸ்-2 மாணவர்கள் தங்கள் கல்வி தகுதியினை தாங்கள் படித்த பள்ளிகளின் மூலமாக 2011-ம் ஆண்டு முதல் நேரடியாக இத்துறையின் இணையதளத்தில் https://tnvelaivaaippu.gov.in பதிவு செய்து அடையாள அட்டை பெற தமிழக அரசால் உரிய வழிவகை செய்யப்பட்டுள்ளது. வேலைவாய்ப்பு அலுவலகத்திற்கு நேரில் வருகை புரியாது, நேரடியாக இத்துறையின் இணையதளம் வாயிலாக பதிவு செய்து கொள்ள வசதி ஏற்படுத்தியமையால், மாணவர்களுக்கு ஏற்படும் போக்குவரத்து செலவு, காலவிரயம், தேவையற்ற அலைச்சல்கள் மற்றும் மாவட்ட வேலைவாய்ப்பு அலுவலகங்களில் ஏற்படும் கூட்ட நெரிசல்கள் ஆகியவை தவிர்க்கப்படுகிறது.

இதை கருத்தில் கொண்டு தற்போது 2018-ம் ஆண்டிற்கான பிளஸ்-2 தேர்ச்சி பெற்ற மாணவர்களின் மதிப்பெண் சான்றிதழ் நாளை(திங்கட்கிழமை) வழங்கப்பட உள்ளதையடுத்து நாளை முதல் 30-ந் தேதி வரை 15 நாட்களுக்கு ஒரே பதிவு மூப்பு தேதி வழங்கி, அவர்கள் பயின்ற பள்ளிகளிலேயே இணையதளம் வாயிலாக வேலைவாய்ப்பு அலுவலக பதிவு பணி நடைபெற சிறப்பு சிறப்பு நடவடிக்கைகளை வேலைவாய்ப்பு மற்றும் பயிற்சித்துறை பள்ளி கல்வித்துறையுடன் இணைந்து மேற்கொண்டு வருகிறது.

எனவே, கிருஷ்ணகிரி மாவட்டத்தில் உள்ள அனைத்து அரசு மற்றும் அரசு உதவிபெறும் மேல்நிலைப்பள்ளிகள், மெட்ரிக் மேல்நிலைப்பள்ளிகள் மற்றும் தனியார் பள்ளிகளிலும் இந்த வசதியினை பயன்படுத்தி, மாணவர்கள் வேலைவாய்ப்பு பதிவுகள் மேற்கொள்ளலாம். மேலும், சி.பி.எஸ்.இ. பாடத்திட்டத்தில் பயின்ற மாணவர்கள், தங்கள் கல்வி தகுதியை வேலைவாய்ப்புத்துறையின் இணையதளத்தில் https://tnvelaivaaippu.gov.in என்ற இணையதளத்தில் பதிவு செய்யலாம். அல்லது அவர்கள் தங்களது மாவட்டத்திற்குரிய வேலைவாய்ப்பு அலுவலகத்தையும் அணுகி பதிவு செய்யலாம் என தெரிவிக்கப்படுகிறது. எனவே, மாணவர்கள் ஏற்கனவே 10-ம் வகுப்பு கல்வித் தகுதியை பதிவு செய்து இருப்பின், அந்த வேலைவாய்ப்பு பதிவு அடையாள அட்டையுடன் மதிப்பெண் சான்று வழங்கப்படும் நாளன்று தாங்கள் பயின்ற பள்ளிகளை அணுகி பிளஸ்-2 கல்வி தகுதியினை கூடுதலாக பதிவு செய்து கொள்ளலாம். பிளஸ்-2 தேர்ச்சி பெற்று புதிதாக பதிவு செய்ய விரும்பும் மாணவர்கள் ஆதார் அட்டை, குடும்ப அட்டை, சாதி சான்றிதழ் ஆகிய விவரங்களுடன் சம்பந்தப்பட்ட பள்ளிகளை அணுகி பதிவுகள் மேற்கொள்ளலாம். 12-ம் வகுப்பு தேர்ச்சி பெற்ற அனைத்து மாணவர்களும் இந்த வாய்ப்பினை பயன்படுத்தி கொள்ளுமாறு கேட்டுக்கொள்ளப்படுகிறார்கள். இவ்வாறு அதில் கூறப்பட்டுள்ளது.