போலீஸ் சப்-இன்ஸ்பெக்டருக்கு கொலை மிரட்டல் வாலிபர் கைது

விழுப்புரம், 

விழுப்புரம் பாகர்ஷா வீதியில் அரசால் தடை செய்யப்பட்ட புகையிலை பொருட்கள் விற்பனை செய்யப்படுவதாக விழுப்புரம் மேற்கு போலீசாருக்கு தகவல் கிடைத்தது.

தகவலின்பேரில் போலீஸ் சப்-இன்ஸ்பெக்டர் பார்த்திபன் மற்றும் போலீசார், பாகர்ஷா வீதியில் உள்ள ஒரு கடையில் அதிரடி சோதனை நடத்தினர். அப்போது அங்கு 96 பாக்கெட் புகையிலை பொருட்கள் இருந்தது கண்டுபிடிக்கப்பட்டது.

இந்த புகையிலை பொருட்களை சப்-இன்ஸ்பெக்டர் பார்த்திபன் பறிமுதல் செய்ய முயன்றார். அப்போது கடை ஊழியர்களான அதே பகுதியை சேர்ந்த தினேஷ் (23), நாராயணன் (40) ஆகியோர் சப்-இன்ஸ்பெக்டர் பார்த்திபனை திட்டி அரசு பணியை செய்ய விடாமல் தடுத்ததோடு அவருக்கு கொலை மிரட்டல் விடுத்தனர். இதையடுத்து தினேஷ், நாராயணன் ஆகிய இருவரின் மீதும் போலீசார் வழக்குப்பதிவு செய்து தினேசை கைது செய்ததோடு, கடையில் இருந்த புகையிலை பொருட்களை பறிமுதல் செய்தனர்.