இளம்பெண்ணை கடத்திச்சென்ற ஆட்டோ டிரைவர் கைது

காங்கேயம்,

இதுகுறித்து போலீஸ்தரப்பில் கூறப்படுவதாவது:-

காங்கேயம் அருகே 17 வயது இளம்பெண் ஒருவர் பிளஸ்-2 முடித்துவிட்டு வீட்டில் இருந்துவந்தார். இந்த நிலையில் கடந்த மே மாதம் 17-ந் தேதி வீட்டில் இருந்த அந்த இளம்பெண் திடீரென மாயமானார். உடனே அவருடைய பெற்றோர், அவரை அக்கம்பக்கத்தில் தேடிப்பார்த்தனர். ஆனால் அவர் கிடைக்கவில்லை. இதனால் அதிர்ச்சி அடைந்த அவர்கள், இதுபற்றி காங்கேயம் அனைத்து மகளிர் போலீஸ் நிலையத்தில் புகார் செய்தனர். அதன் பேரில் போலீசார் வழக்குப்பதிவு செய்து விசாரணை நடத்தினார்கள். போலீஸ் விசாரணையில், காங்கேயம் அருகே படியூரில் ஆட்டோ ஓட்டி வந்த சேலம் மாவட்டம் ஆத்தூரை சேர்ந்த சந்தோஷ்குமார் (வயது 24) என்பவர் அந்த இளம்பெண்ணை ஆசை வார்த்தை கூறி கடத்தி சென்றது தெரியவந்தது.

இதைதொடர்ந்து சந்தோஷ்குமாரை கைது செய்து, இளம்பெண்ணை மீட்க போலீஸ் இன்ஸ்பெக்டர் ஹேமலதா தலைமையில் தனிப்படை அமைக்கப்பட்டது. தனிப்படை போலீசார் விசாரணையில் சந்தோஷ்குமார் அந்த இளம்பெண்ணுடன் ஏர்வாடி தர்கா பகுதியில் தங்கியிருப்பது தெரியவந்தது. இதை தொடர்ந்து போலீசார் ஏர்வாடிக்கு விரைந்து சென்று, அங்கு தங்கி இருந்த சந்தோஷ்குமாரை கைது செய்தனர். பின்னர் அந்த இளம்பெண்ணை மீட்டு காங்கேயத்துக்கு அழைத்து வந்தனர்.

பின்னர், அந்த இளம்பெண் மருத்துவ பரிசோதனைக்காக திருப்பூர் அரசு ஆஸ்பத்திரிக்கு அனுப்பி வைக்கப்பட்டார். சந்தோஷ்குமார் கோர்ட்டில் ஆஜர்படுத்தப்பட்டு கோவை மத்திய சிறையில் அடைக்கப்பட்டார். இளம் பெண்ணை ஆசைவார்த்தை கூறி கடத்திச்சென்றதாக கைது செய்யப்பட்டுள்ள சந்தோஷ்குமாருக்கு ஏற்கனவே திருமணமாகி ஒரு குழந்தை இருப்பது குறிப்பிடத்தக்கது.