மணல் கடத்தல்; 5 பேர் கைது

காஞ்சீபுரம்,

 காஞ்சீபுரம் தேனம்பாக்கம் பகுதியில் இருந்து மோட்டார்சைக்கிளில் மணல் கடத்தப்படுவதாக காஞ்சீபுரம் தாலுகா போலீசாருக்கு தகவல் கிடைத்தது, அதையொட்டி போலீசார் அங்கு விரைந்து சென்றனர். அப்போது, மோட்டார்சைக்கிளில் மணல் கடத்தியது தெரிய வந்தது, இதையொட்டி, தேனம்பாக்கத்தை சேர்ந்த நவீன்குமார் (வயது 19) என்பவரை போலீசார் கைது செய்து மோட்டார்சைக்கிளை பறிமுதல் செய்தனர்.  காஞ்சீபுரம் அருகே ஓ.எம். மங்களம் என்ற இடத்தில் மணல் கடத்தப்படுவதாக சுங்குவார்சத்திரம் போலீசாருக்கு தகவல் கிடைத்தது. அதையொட்டி, போலீசார் அங்கு விரைந்து சென்றனர். 

அப்போது லாரியில் மணல் கடத்தியது தெரியவந்தது. இதையொட்டி சுங்குவார்சத்திரம் போலீசார் வழக்குப்பதிவு செய்து வடகால் பாக்கத்தை சேர்ந்த தமிழ்செல்வன் (22), வேலூர் மாவட்டம் நெமிலியை சேர்ந்த டில்லி (64), வேலூர் மாவட்டம் கலவை புதூரை சேர்ந்த வஞ்சிரா (41), வேலூர் மாவட்டம் அன்னந்தாளை கிராமத்தை சேர்ந்த ரஜினிகுமார் (21) ஆகியோரை  போலீசார் கைது செய்தனர்.