குமாரபாளையத்தில் காவிரி கரையோர பகுதிகளை அமைச்சர்கள் ஆய்வு

குமாரபாளையம்,

குமாரபாளையத்தில் வெள்ளத்தால் பாதிக்கப்பட்ட காவிரி கரையோர பகுதிகளை அமைச்சர்கள் தங்கமணி, சரோஜா ஆகியோர் பார்வையிட்டு ஆய்வு செய்தனர். இதற்கிடையில் தண்ணீர் அதிகரிப்பால் குமாரபாளையத்தில் சாலைகள் துண்டிக்கப்பட்டு போக்குவரத்துக்கு தடை விதிக்கப்பட்டு உள்ளது.

காவிரி ஆற்றில் ஏற்பட்ட வெள்ளப்பெருக்கால் குமாரபாளையம் மற்றும் பள்ளிபாளையத்தில் காவிரி கரையோர பகுதிகளில் வசித்து வந்த 668 குடும்பங்களை சேர்ந்த 806 ஆண்கள், 898 பெண்கள் மற்றும் 384 குழந்தைகள் என மொத்தம் 2,088 பேர் அரசு அமைத்துள்ள 16 நிவாரண முகாம்களில் பாதுகாப்பாக தங்க வைக்கப்பட்டுள்ளனர். இவர்களை அமைச்சர்கள் தங்கமணி, சரோஜா ஆகியோர் நேரில் பார்வையிட்டு பொதுமக்களுக்கு தேவையான நிவாரண உதவிகளை வழங்கினர். மேலும் வெள்ளத்தால் பாதிக்கப்பட்ட காவிரி கரையோர பகுதிகளையும் அவர்கள் பார்வையிட்டு ஆய்வு செய்தனர்.


காவிரி ஆற்றின் கரையோர பகுதிகளான குமாரபாளையம், பள்ளிபாளையம் பகுதிகளில் நீர்மட்டம் உயர்ந்து கரையோர பகுதிகளில் உள்ள வீடுகளில் நீர் சூழ்ந்துள்ளது. காவிரி மற்றும் பவானி ஆறுகள் பவானி கூடுதுறையில் கலக்கிறது. இதன் காரணமாக தண்ணீர் அழுத்தம் ஏற்பட்டு கோம்பு பள்ளத்தின் வழியாக தண்ணீர் குமாரபாளையம் நகருக்குள் புகுந்துள்ளது. இதனால் எப்போதும் பரபரப்பாக இருக்கும் பழைய பள்ளிபாளையம் ரோடு, அப்பன் பங்களா, பெருமாபாளையம் சாலைகள் துண்டிக்கப்பட்டு போக்குவரத்துக்கு தடை விதிக்கப்பட்டு உள்ளது. அங்கு போலீசார் தடுப்பு ஏற்படுத்தி உள்ளனர்.