கடகவாரஹள்ளி கிராமத்தில் தகராறை தடுக்க முயன்ற அண்ணன் கொலை விவசாயி கைது

கோலார் தங்கவயல்,

கடகவாரஹள்ளி கிராமத்தில் தகராறை தடுக்க முயன்ற அண்ணனை உருட்டுக்கட்டையால் தாக்கி கொலை செய்த விவசாயியை போலீசார் கைது செய்தனர்.

விவசாயி

சிக்பள்ளாப்பூர் மாவட்டம் சிந்தாமணி தாலுகா கடகவாரஹள்ளி கிராமத்தைச் சேர்ந்தவர் சீனிவாசரெட்டி(வயது 45). விவசாயி. இவரது மனைவி சரஸ்வதி அம்மாள்(40). சீனிவாசரெட்டிக்கு மது குடிக்கும் பழக்கம் இருந்து வருவதாக கூறப்படுகிறது. தினமும் அவர் மது குடித்துவிட்டு வந்து மனைவியிடம் தகராறு செய்வாராம். நேற்று முன்தினம் இரவும் சீனிவாச ரெட்டி மது குடித்துவிட்டு வந்து மனைவியிடம் தகராறில் ஈடுபட்டாராம். அப்போது அங்கு வந்த சீனிவாசரெட்டியின் அண்ணன் ஆஞ்சநேயரெட்டி, தகராறை விலக்கி விட்டாராம்.

பின்னர் அவர் சீனிவாசரெட்டிக்கு அறிவுரை கூறிவிட்டு, சரஸ்வதி அம்மாளை தன்னுடைய வீட்டிற்கு அழைத்துச் சென்றுவிட்டார். நேற்று காலையில் சீனிவாசரெட்டி தனது அண்ணன் வீட்டிற்கு சென்றார். அங்கு தனது மனைவியை சந்தித்து சமாதானம் பேசி, வீட்டிற்கு அழைத்து வந்தார்.

உருட்டு கட்டையால் தாக்கினார்

வீட்டிற்கு வந்த பின்பு மீண்டும் கணவன், மனைவிக்கு இடையே தகராறு ஏற்பட்டது. இதில் ஆத்திரம் அடைந்த சீனிவாசரெட்டி, தனது மனைவி சரஸ்வதி அம்மாளை உருட்டுக் கட்டையால் தாக்கினார். இதில் அவர் ரத்த வெள்ளத்தில் மயங்கி விழுந்தார். அப்போது அங்கு வந்த ஆஞ்சநேயரெட்டி, தனது தம்பியை தடுக்க முயன்றார்.

ஆனால் அவரையும், சீனிவாச ரெட்டி சரமாரியாக உருட்டுக்கட்டையால் தாக்கினார். இதில் பலத்த காயம் அடைந்த ஆஞ்சநேய ரெட்டி ரத்த வெள்ளத்தில் மயங்கி விழுந்து சம்பவ இடத்திலேயே பலியானார். இதையடுத்து சீனிவாசரெட்டி தப்பி ஓடிவிட்டார்.

கைது

இந்த கொலை சம்பவம் குறித்து கெஞ்சாரஹள்ளி போலீசாருக்கு தகவல் தெரிவிக்கப்பட்டது. தகவல் அறிந்த போலீசார் சம்பவ இடத்திற்கு விரைந்து வந்து விசாரணை நடத்தினர். பின்னர் ஆஞ்சநேயரெட்டியின் உடலை கைப்பற்றி பிரேத பரிசோதனைக்காக மாவட்ட அரசு ஆஸ்பத்திரிக்கு அனுப்பி வைத்தனர். சரஸ்வதி அம்மாளையும் மீட்டு சிகிச்சைக்காக ஆஸ்பத்திரிக்கு அனுப்பி வைத்தனர். மேலும் இதுபற்றி போலீசார் வழக்குப்பதிவு செய்து தலைமறைவாக இருந்த சீனிவாசரெட்டியை கைது செய்தனர். தொடர்ந்து அவரிடம் போலீசார் விசாரித்து வருகிறார்கள். இந்த சம்பவம் அப்பகுதியில் பெரும் பரபரப்பை ஏற்படுத்தி உள்ளது.