குடகில் மறுசீரமைப்பு பணிகள் தீவிரம்: 5 பேரின் உடல்கள் மீட்பு

குடகு,

மேற்கு தொடர்ச்சி மலை அடிவாரத்தில் அமைந்துள்ள குடகு மாவட்டத்தில் கடந்த 2 வாரங்களாக கனமழை கொட்டி தீர்த்தது.

இந்த கனமழையாலும், நிலச்சரிவாலும் குடகு மாவட்டத்தில் வரலாறு காணாத சேதம் ஏற்பட்டுள்ளது. தொடர் மழை, நிலச்சரிவால் மக்கள் கடுமையாக பாதிக்கப்பட்டுள்ளனர். ஆயிரக்கணக்கான வீடுகள் இடிந்து விழுந்துள்ளன. இதன்காரணமாக சுமார் 4 ஆயிரம் பேர், உடைமைகளையும், உறவுகளையும் இழந்து நிவாரண முகாம்களில் பரிதவித்து வருகிறார்கள். குடகு மாவட்டத்தில் மொத்தம் 41 நிவாரண முகாம்கள் அமைக்கப்பட்டுள்ளன. அந்த முகாம்களில் மக்களுக்கு தேவையான அனைத்து அடிப்படை வசதிகளும் செய்து கொடுக்கப்பட்டுள்ளது.

மேலும் மழை வெள்ளத்தில் சிக்கியவர்களை மீட்பதற்காக தேசிய பேரிடர் மீட்பு குழுவினர், ராணுவம், இந்திய விமான படை, கடலோர காவல் படை, தீயணைப்பு படை, தன்னார்வலர்கள் என ஆயிரக்கணக்கானோர் தீவிரமாக ஈடுபட்டு வருகின்றனர். தொடர் கனமழை, நிலச்சரிவால் குடகு மாவட்டத்தில் இதுவரை 12 பேர் உயிரிழந்துள்ளனர்.

குடகு மாவட்டத்தில் மடிகேரி, மக்கந்தூர், ஆலேறி, சுண்டிகொப்பா, பாலூர், கல்லூர், தொட்டகுந்துபெட்டா, ஜோடுபாலா, சம்பாஜே ஆகிய பகுதிகள் தான் அதிகமாக பாதிக்கப்பட்டுள்ளது. குடகு மாவட்டத்தில் கடந்த ஒரு வாரத்திற்கு மேலாக கொட்டி தீர்த்து வந்த கனமழை தற்போது குறைந்துள்ளது. முக்கொட்லுவை தவிர மற்ற பகுதிகளில் நேற்று வெயில் அடித்தது. முக்கொட்லு பகுதியில், பலத்த காற்று வீசியதுடன், மழை பெய்யும் சூழலும் நிலவி வருகிறது. நீண்ட நாட்களுக்கு பிறகு குடகில் சூரியன் வெளியே வந்துள்ளதால், அந்தப்பகுதி மக்கள் மிகுந்த மகிழ்ச்சி அடைந்துள்ளனர்.

இதன்காரணமாக, குடகு மாவட்டத்தில் மறுசீரமைப்பு பணிகள் தீவிரமாக நடந்து வருகிறது. கர்நாடகத்தின் பல்வேறு பகுதிகளில் இருந்து ஏராளமான தன்னார்வலர்கள் குடகிற்கு வந்து மறுசீரமைப்பு பணிகளில் ஈடுபட்டு வருகிறார்கள். மேலும், மாநிலத்தில் இருந்து பல்வேறு பகுதிகளில் இருந்தும் உணவு பொருட்கள், துணிகள், மருந்து பொருட்கள் உள்ளிட்ட நிவாரண பொருட்கள் குவிந்த வண்ணம் உள்ளன. மேலும் மைசூருவில் இருந்து துணிகளும் விமானத்தில் குடகிற்கு அனுப்பி வைக்கப்பட்டுள்ளன.

குடகு மாவட்டத்தில் மழை நின்றுள்ளதால், மாவட்ட நிர்வாகம் சார்பில் மழை சேதங்கள் ஆய்வு செய்யப்பட்டு வருகிறது. இதற்காக 8 ஹெலிகேமராக்கள் பயன்படுத்தப்பட்டு வருகிறது. இந்த கேமராக்கள் மூலம், முக்கொட்லு உள்பட பல்வேறு பகுதிகளை ஆய்வு செய்யப்பட்டு வருகிறது. அதில், கிராமங்கள் எந்த நிலையில் உள்ளது. எவ்வளவு சேதமடைந்துள்ளது. அங்கு யாராவது சிக்கி உள்ளனரா? என்றும் ஆய்வு செய்யப்பட்டு வருகிறது. ராணுவ வீரர்கள், தேசிய பேரிடர் மீட்பு குழுவினரின் தேடுதல் பணி நேற்றும் தொடர்ந்து நடந்தது.

அப்போது, முக்கொட்லு பகுதியில் 2 பேரின் உடல்கள் மீட்கப்பட்டுள்ளன. அவர்களின் பெயர் விவரங்கள் தெரியவில்லை. இதேபோல, மக்கந்தூர் அருகே எம்மேதாளு கிராமத்தில் மழை வெள்ளத்தில் சிக்கி, வீட்டுக்குள் பிணமாக கிடந்த சந்திரவதி, அவருடைய மகன் உமேஷ் ஆகியோரின் உடல்களும் மீட்கப்பட்டுள்ளன. மேலும், மடிகேரி அருகே அஜ்ஜரபாடி கிராமத்தில் கூலி தொழிலாளியான பவன் (வயது 37) என்பவரின் உடலையும் தேசிய பேரிடர் மீட்பு குழுவினர் மீட்டுள்ளனர். குடகு மாவட்டத்தில் நேற்று 5 பேரின் உடல்கள் மீட்கப்பட்டன. அவர்களின் 5 பேரின் உடல்களும் மடிகேரி அரசு ஆஸ்பத்திரிக்கு பிரேத பரிசோதனைக்காக அனுப்பி வைக்கப்பட்டுள்ளன. மேலும், ஆபத்தான பகுதியில் யாராவது சிக்கி உள்ளனரா? மண்சரிவு ஏற்பட்ட பகுதிகளில் ஏதாவது உடல் கிடக்கிறதா? என்பது பற்றி அதிகாரிகள் தொடர்ந்து தேடுதல் நடத்தி வருகிறார்கள்.

இந்த நிலையில் மத்திய அரசின் உத்தரவின்பேரில் நேற்று குடகு மாவட்டத்துக்கு தேசிய புவியியல் ஆராய்ச்சி மைய (என்.ஜி.ஆர்.ஐ.) விஞ்ஞானிகள் வந்தனர். விஞ்ஞானி ராகவன் தலைமையிலான அதிகாரிகள் மடிகேரிக்கு வந்து அதிகாரிகளுடன் ஆலோசனை நடத்தினார்கள். பின்னர் அவர்கள், மழை வெள்ளம், நிலச்சரிவால் பாதிக்கப்பட்ட பகுதிகளுக்கு நேரில் சென்று பார்வையிட்டு ஆய்வு செய்தனர். அவர்கள் குடகில் ஆய்வு செய்து மத்திய அரசுக்கு அறிக்கை தாக்கல் செய்ய உள்ளனர்.