நெல்லை அருகே பயங்கரம்: விவசாயி சரமாரி வெட்டிக்கொலை 3 பெண்டாட்டிக்காரருக்கு வலைவீச்சு

மானூர், 

நெல்லை அருகே விவசாயி சரமாரியாக வெட்டிக் கொலை செய்யப்பட்டார். இது தொடர்பாக 3 பெண்டாட்டிக்காரரை போலீசார் வலைவீசி தேடி வருகின்றனர்.

இதுகுறித்து போலீஸ் தரப்பில் கூறப்பட்டதாவது:-

விவசாயி கொலை

நெல்லை மாவட்டம் மானூர் அருகே உள்ள உக்கிரன்கோட்டை சிவன் கோவில் தெருவை சேர்ந்தவர் தம்பி ராஜா. இவருடைய மகன் சண்முகசுந்தரம் என்ற சின்னையா (வயது 39), விவசாயி.

நேற்று மாலையில் உக்கிரன்கோட்டை பிள்ளையார் கோவில் எதிரே ரெட்டியார்பட்டிக்கு செல்லும் மெயின் ரோட்டில் சண்முகசுந்தரம் ரத்த வெள்ளத்தில் பிணமாக கிடந்தார். இதுபற்றிய தகவல் அறிந்ததும் மானூர் போலீசார் சம்பவ இடத்துக்கு விரைந்து சென்று பார்வையிட்டனர். அங்கு சண்முகசுந்தரம் அரிவாளால் சரமாரியாக வெட்டி கொலை செய்யப்பட்டு கிடந்தது தெரியவந்தது.

உடனே அவரது உடலை போலீசார் கைப்பற்றி பிரேத பரிசோதனைக்காக பாளையங்கோட்டை ஐகிரவுண்டு அரசு ஆஸ்பத்திரிக்கு அனுப்பி வைத்தனர். சண்முகசுந்தரத்துக்கு கிருஷ்ணவேணி என்ற மனைவியும், 2 மகன்களும், ஒரு மகளும் உள்ளனர்.

3 பெண்டாட்டிக்காரர்

இந்த சம்பவம் தொடர்பாக போலீசார் நடத்திய முதற்கட்ட விசாரணையில், சண்முகசுந்தரத்துக்கும், அதே ஊரைச் சேர்ந்த மகராஜா (43) என்பவருக்கும் இடையே கடந்த 3 ஆண்டுகளுக்கு முன்பு தகராறு ஏற்பட்டு உள்ளது. இதில் மகராஜா தாக்கப்பட்டார். இதனால் அவர்கள் இருவருக்கும் இடையே முன்விரோதம் இருந்து வந்ததாக தெரிகிறது.

இதன் காரணமாக சண்முகசுந்தரத்தை மகராஜா அரிவாளால் வெட்டிக்கொலை செய்து இருப்பது தெரியவந்தது. மகராஜாவுக்கு 3 மனைவிகள் உண்டு. ஆலங்குளம் அருகே அய்யனார்குளத்தில் முதல் மனைவியும், மகளும் உள்ளனர். மகளுக்கு திருமணம் முடிந்து விட்டது. உக்கிரன்கோட்டையில் 2-வது மனைவி முத்துலட்சுமியும், 3 மகள்களும், ஒரு மகனும் உள்ளனர்.

போலீஸ் வலைவீச்சு

3-வது மனைவி மானூர் அருகே உள்ள எட்டாங்குளத்தில் வசித்து வருகிறார். தற்போது உக்கிரன்கோட்டையில் முத்துலட்சுமியுடன், மகராஜா வசித்து வருகிறார். இந்த பயங்கர கொலை தொடர்பாக மானூர் போலீஸ் இன்ஸ்பெக்டர் ஜீன்குமார், முத்துலட்சுமியிடம் விசாரணை நடத்தி வருகிறார். தலைமறைவாக உள்ள மகராஜாவை போலீசார் வலைவீசி தேடி வருகின்றனர். முன்விரோத தகராறில் விவசாயி வெட்டிக்கொலை செய்யப்பட்டது அப்பகுதியில் பெரும் பரபரப்பை ஏற்படுத்தி உள்ளது.