மும்பையில் புதிய உச்சத்தை தொட்டது பெட்ரோல் விலை ரூ.90-ஐ தாண்டியது டீசல் ரூ.78.58-க்கு விற்பனை

மும்பை,

71 அமெரிக்க டாலராக இருந்த பேரல் கச்சா எண்ணெய் விலை கடந்த 5 வாரங்களில் 80 டாலராக உயர்ந்து உள்ளது.

இதே நேரத்தில் இந்திய ரூபாயின் மதிப்பும் 5 முதல் 6 சதவீதம் வரை வீழ்ச்சி அடைந்துள்ளது. இதனால் பெட்ரோல் டீசல், விலை தொடர்ந்து அதிகரித்து வருகிறது.

ஏற்கனவே பெட்ரோல், டீசல் விலை உயர்வை கண்டித்து மும்பையில் காங்கிரஸ் கட்சியினர் மிகப்பெரிய அளவில் போராட்டத்தை நடத்தினர்.

இந்தநிலையில் நேற்று மும்பையில் பெட்ரோல் விலை ரூ.90-ஐ தாண்டி புதிய உச்சத்தை தொட்டு உள்ளது. பெட்ரோல் விலை நேற்று 11 பைசா அதிகரித்தது. மும்பையில் இந்தியன் ஆயில் நிறுவன பெட்ரோல் பங்குகளில் லிட்டர் பெட்ரோல் ரூ.90.08-க்கும், இந்துஸ்தான் நிறுவன பங்குகளில் ரூ.90.17-க்கும், பாரத் பெட்ரோலிய பங்குகளில் ரூ.90.14-க்கும் விற்பனை செய்யப்பட்டது.


நாட்டிலேயே தலைநகர் டெல்லியில் குறைந்தபட்சமாக ஒரு லிட்டர் பெட்ரோல் ரூ.82.72-க்கு விற்பனை செய்யப்படுகிறது. கொல்கத்தாவில் பெட்ரோல், டீசல் முறையே ரூ.84.63, ரூ.75.95-க்கும், சென்னையில் ரூ.86.08, ரூ.78.35-க்கும் விற்பனை செய்யப்படுகிறது. தொடர்ந்து உயர்ந்து வரும் பெட்ரோல், டீசல் விலை பொது மக்கள் இடையே வேதனையை ஏற்படுத்தி உள்ளது.

பெட்ரோல், டீசல் விலையை குறைக்க மத்திய அரசு உடனடியாக நடவடிக்கை எடுக்க வேண்டும் என பொதுமக்கள் வலியுறுத்தி உள்ளனர்.