வேப்பூரில்: மோட்டார் சைக்கிள் மீது வாகனம் மோதல்; 2 வாலிபர்கள் பலி

வேப்பூர், 

கன்னியாகுமரி மாவட்டம் விளவங்கோடு அருகில் உள்ள பறையன்விளையை சேர்ந்தவர் ஸ்டூவர்ட் ஜோஸ் மகன் அஜித்ஜோஸ்(வயது 21). இவருடைய உறவினர் கல்லுப்பொற்றை பகுதியை சேர்ந்த செல்வராஜ் மகன் வினித்(21). இவர்கள் இருவரும் சென்னை மேடவாக்கத்தில் உள்ள ஓட்டலில் ஊழியராக வேலைபார்த்து வந்தனர்.

இந்த நிலையில் கடந்த சில தினங்களுக்கு முன்பு அஜித்ஜோசும், வினித்தும் சொந்த ஊருக்கு வந்திருந்தனர். பின்னர் இருவரும் அங்கிருந்து மோட்டார் சைக்கிளில் சென்னை செல்ல முடிவு செய்தனர்.

அதன்படி நேற்று முன்தினம் அஜித்ஜோசும், வினித்தும் ஒரு மோட்டார் சைக்கிளில் சென்னைக்கு புறப்பட்டனர். இவர்கள் நேற்று அதிகாலை 4 மணியளவில் திருச்சி- சென்னை தேசிய நெடுஞ்சாலையில் கடலூர் மாவட்டம் வேப்பூர் பஸ் நிறுத்தம் அருகே வந்து கொண்டிருந்தனர்.

அப்போது அந்த வழியாக வந்த வாகனம் ஒன்று இவர்கள் வந்த மோட்டார் சைக்கிள் மீது மோதிவிட்டு நிற்காமல் சென்றது.

இதில் பலத்த காயமடைந்த அஜித்ஜோசும், வினித்தும் சம்பவ இடத்திலேயே துடிதுடித்து பரிதாபமாக உயிரிழந்தனர். இதுபற்றி தகவல் அறிந்த வேப்பூர் போலீசார் சம்பவ இடத்துக்கு விரைந்து வந்து விபத்து குறித்து விசாரணை நடத்தினர். பின்னர் விபத்தில் பலியான அஜித்ஜோஸ், வினித் ஆகியோரின் உடலை கைப்பற்றி பிரேத பரிசோதனைக்காக விருத்தாசலம் அரசு மருத்துவமனைக்கு அனுப்பி வைத்தனர்.

இந்த விபத்து குறித்த புகாரின்பேரில் வேப்பூர் போலீசார் வழக்குப்பதிவு செய்து விசாரணை நடத்தி வருகின்றனர்.