திண்டிவனம் அருகே: மோட்டார் சைக்கிள் மீது பஸ் மோதல்; தடகள பயிற்சியாளர் பலி

திண்டிவனம், 

சென்னை தேனாம்பேட்டை பகுதியை சேர்ந்தவர் மகேந்திரன் மகன் சக்திவேல்(வயது 28), தடகள பயிற்சியாளர். இவர் கடந்த சில நாட்களுக்கு முன்பு சொந்த வேலை காரணமாக தனது மோட்டார் சைக்கிளில் கிருஷ்ணகிரிக்கு சென்றிருந்தார். பின்னர் அவர் அங்கு சொந்த வேலைகளை முடித்து விட்டு நேற்று முன்தினம் மாலை அங்கிருந்து சென்னைக்கு புறப்பட்டார். இரவு 11 மணியளவில் திண்டிவனம் அடுத்த கொணக்கப்பட்டு பஸ் நிறுத்தம் அருகே வந்தபோது, பின்னால் செஞ்சியில் இருந்து திண்டிவனம் நோக்கி வந்த அரசு டவுன் பஸ் எதிர்பாராதவிதமாக சக்திவேல் ஓட்டிச் சென்ற மோட்டார் சைக்கிள் மீது மோதியது.

இதில் பலத்த காயமடைந்த அவர் சம்பவ இடத்திலேயே பரிதாபமாக உயிரிழந்தார். இதுபற்றி தகவல் அறிந்த ரோஷணை போலீசார் சம்பவ இடத்துக்கு விரைந்து வந்து, விபத்தில் பலியான சக்திவேல் உடலை கைப்பற்றி பிரேத பரிசோதனைக்காக திண்டிவனம் அரசு மருத்துவமனைக்கு அனுப்பி வைத்தனர். மேலும் இந்த விபத்து குறித்த புகாரின்பேரில் போலீசார் வழக்குப்பதிவு செய்து விசாரணை நடத்தி வருகிறார்கள்.