வீட்டின் பூட்டை உடைத்து 22 பவுன் நகை கொள்ளை மர்மநபர்களுக்கு போலீசார் வலைவீச்சு

புதுக்கோட்டை வடக்கு 2-ம் வீதியை சேர்ந்தவர் வெங்கட்ராமன் (வயது 60). சாக்கு வியாபாரியான இவர் தனது குடும்பத்தினருடன் கடந்த 25-ந் தேதி வீட்டை பூட்டிவிட்டு பொள்ளாச்சியில் உள்ள தனது உறவினர் இல்ல திருமண விழாவில் கலந்து கொள்வதற்காக சென்றார். பின்னர் திருமணத்தை முடித்து விட்டு நேற்று முன் தினம் மீண்டும் புதுக்கோட்டையில் உள்ள வீட்டிற்கு வந்தார்.

அப்போது வீட்டின் முன்பக்க கதவு உடைக்கப்பட்டு இருப்பதை கண்டு அதிர்ச்சி அடைந்தார். இதையடுத்து அவர் உள்ளே சென்று பார்த்தார். அப்போது வீட்டின் முன்பக்க கதவை உடைத்து உள்ளே புகுந்த மர்மநபர்கள் வீட்டில் இருந்த பீரோவின் சாவியை எடுத்து, பீரோவை திறந்து, அதில் இருந்து 22 பவுன் தங்க நகைகளை கொள்ளையடித்து விட்டு தப்பி சென்றது தெரியவந்தது.

இதைத்தொடர்ந்து இந்த கொள்ளை சம்பவம் குறித்து வெங்கட்ராமன் புதுக்கோட்டை டவுன் போலீசாருக்கு தகவல் தெரிவித்தார். தகவலின் பேரில் போலீசார் சம்பவ இடத்துக்கு வந்து விசாரணை நடத்தினார்கள். மேலும் தடவியல் நிபுணர்கள் வரவழைக்கப்பட்டு, தடயங்களை சேகரித்தனர். இதைத்தொடர்ந்து டவுன் போலீசார் இந்த கொள்ளை சம்பவம் குறித்து வழக்குப் பதிவு செய்து, வீட்டின் முன்பக்க கதவை உடைத்து 22 பவுன் தங்க நகைகளை கொள்ளையடித்து சென்ற மர்மநபர்களை வலைவீசி தேடி வருகின்றனர்.