சாத்தான்குளம் ஆட்டோ டிரைவர் கொலை வழக்கில் ஐ.டி.ஐ. மாணவர் உள்பட 3 பேர் கைது

சாத்தான்குளம், 

சாத்தான்குளத்தில் ஆட்டோ டிரைவர் கொலை செய்யப்பட்ட வழக்கில் ஐ.டி.ஐ. மாணவர் உள்பட 3 பேரை போலீசார் கைது செய்தனர். மேலும் 2 பேரை வலைவீசி தேடி வருகின்றனர்.

ஆட்டோ டிரைவர் கொலை

சாத்தான்குளம் அருகே வீர இடக்குடி தெருவைச் சேர்ந்தவர் மூக்காண்டி. இவருடைய மகன் மணிகண்டன் (வயது 38). ஆட்டோ டிரைவர். இவரை கடந்த 30-ந்தேதி இரவில் சாத்தான்குளம்-தட்டார்மடம் ரோடு ரஸ்தா தெருவைச் சேர்ந்த மந்திரம் மகன் மற்றொரு மணிகண்டன் (26) உள்ளிட்ட 5 பேர் கொண்ட கும்பலால் வெட்டிக் கொலை செய்யப்பட்டார்.

இதுகுறித்து சாத்தான்குளம் போலீசார் வழக்குப்பதிவு செய்து விசாரணை நடத்தினர்.

விசாரணையில், கொலை செய்யப்பட்ட மணிகண்டனுக்கும், மற்றொரு மணிகண்டனுக்கும் இடையே தசரா திருவிழா வரவு-செலவு கணக்குகளை கேட்டது தொடர்பாக முன்விரோதம் இருந்தது தெரியவந்தது. இதையடுத்து மணிகண்டன் உள்ளிட்ட 5 பேரை போலீசார் தேடி வந்தனர்.

3 பேர் கைது

இந்த நிலையில் சாத்தான்குளம் அருகே பேய்க்குளம் பஜாரில் நேற்று சந்தேகப்படும்படியாக நின்ற 3 பேரை போலீசார் பிடித்து விசாரித்தனர். விசாரணையில், அவர்கள் சாத்தான்குளம் வீர இடக்குடி தெருவைச் சேர்ந்த வேல் மகன் செல்லப்பா (18), பாப்புலிங்கம் மகன் இசக்கிமுத்து (18), முஸ்லிம் தெருவைச் சேர்ந்த மரிய ஜோசப் மகன் கிங்ஸ்டன் ஜெயசிங் (18) என்பதும், இவர்கள் மணிகண்டன் கொலை வழக்கில் சம்பந்தப்பட்டவர்கள் என்பதும் தெரியவந்தது. இதையடுத்து அவர்கள் 3 பேரையும் போலீசார் கைது செய்தனர். பின்னர் அவர்களை சாத்தான்குளம் கோர்ட்டில் ஆஜர்படுத்தி, சிறையில் அடைத்தனர். கைதான செல்லப்பா, ஆனந்தபுரம் ஐ.டி.ஐ.யில் படித்து வருகிறார். இசக்கிமுத்து ஆட்டோ டிரைவராக உள்ளார். கிங்ஸ்டன் ஜெயசிங் கேரள மாநிலத்தில் கூலி வேலை செய்து வருகிறார் என்பது குறிப்பிடத்தக்கது. மேலும் தலைமறைவாக உள்ள மணிகண்டன், சியாம் மகன் ராஜா ஆகிய 2 பேரை போலீசார் வலைவீசி தேடி வருகின்றனர்.