ஆலங்குளம் அருகே லாரி– மோட்டார் சைக்கிள் மோதல்; வாலிபர்கள் 2 பேர் பலி

ஆலங்குளம்,

ஆலங்குளம் அருகே லாரி, மோட்டார் சைக்கிள் மோதிய விபத்தில் வாலிபர்கள் 2 பேர் பரிதாபமாக பலியானார்கள்.

திண்டுக்கல் அருகே உள்ள காரியாப்பட்டியை சேர்ந்தவர் ரவிச்சந்திரன் (வயது 34). பைனான்சியர். இவருடைய நண்பர் சஞ்சீவகுமார் (26). லாரி டிரைவர். 2 பேரும் சம்பவத்தன்று நெல்லை அருகே பாளையங்கோட்டையில் உள்ள தனது நண்பரை பார்க்க வந்தனர். பின்னர் 2 பேரும் நண்பரின் மோட்டார் சைக்கிளை எடுத்துக்கொண்டு, குற்றாலத்திற்கு குளிக்க சென்றனர். அங்கு 2 பேரும் மகிழ்ச்சியாக குளித்தனர். பின்னர் அங்கிருந்து 2 பேரும் அதே மோட்டார் சைக்கிளில் பாளையங்கோட்டைக்கு சென்று கொண்டிருந்தனர். மோட்டார் சைக்கிளை ரவிச்சந்திரன் ஓட்டினார்.

மோட்டார் சைக்கிள் ஆலங்குளம் அருகே உள்ள புதூர் பெட்ரோல் பங்க் அருகே சென்றபோது அந்த பகுதியில் வந்த லாரி எதிர்பாராதவிதமாக மோட்டார் சைக்கிள் மீது பயங்கரமாக மோதியது. இதில் மோட்டார் சைக்கிளில் இருந்து தூக்கிவீசப்பட்ட 2 பேரும் சம்பவ இடத்திலேயே ரத்தவெள்ளத்தில் பரிதாபமாக உயிரிழந்தனர். இதுகுறித்து தகவலறிந்த சீதபற்பநல்லூர் போலீசார் சம்பவ இடத்திற்கு விரைந்து சென்று 2 பேரின் உடல்களையும் மீட்டு பிரேத பரிசோதனைக்காக பாளையங்கோட்டை ஐகிரவுண்டு அரசு ஆஸ்பத்திரிக்கு அனுப்பி வைத்தனர்.

மேலும் இதுகுறித்து வழக்குப்பதிவு செய்து, லாரியை ஓட்டி வந்த கேரள மாநிலம் கோழிக்கோடை சேர்ந்த அஷ்ரப் என்பவரை கைது செய்து, விசாரணை நடத்தி வருகின்றனர்.