வேலூர் சத்துவாச்சாரியில் பயங்கரம்: தலையில் அம்மிக்கல்லை போட்டு ரவுடி கொலை கள்ளக்காதலி உள்பட 3 பேருக்கு வலைவீச்சு

வேலூர்,

வேலூர் சத்துவாச்சாரி வ.உ.சி.நகரில் வசித்தவர் தங்கராஜ் (வயது 32). பிரபல ரவுடியான வசூர் ராஜாவின் கூட்டாளியாக இவர் செயல்பட்டுள்ளார். இவர் மீது வேலூர் வடக்கு, தெற்கு, சத்துவாச்சாரி உள்பட பல்வேறு போலீஸ் நிலையங்களில் கொலை, திருட்டு, வழிப்பறி வழக்குகள் உள்ளன. தங்கராஜ் அடிக்கடி வள்ளலார் செல்லும்போது அங்கு தண்டுமாரி (40) என்ற பெண் நடத்தி வரும் டிபன் கடைக்கு சென்று சாப்பிடுவது வழக்கம். அப்போது இருவருக்கும் இடையே பழக்கம் ஏற்பட்டுள்ளது.

கடந்த சில ஆண்டுகளுக்கு முன்பு தண்டுமாரியின் கணவர் இறந்து விட்டார். இதனை தொடர்ந்து இவர்களது பழக்கம் கள்ளக்காதலாக மாறியது. தண்டுமாரிக்கு போடி என்கிற தமிழரசன், (20), தர்மன் (18) என 2 மகன்கள் உள்ளனர்.

கள்ளக்காதலர்களாக மாறியபின் தங்கராஜ் வேலைக்கு செல்லாமல் தண்டுமாரியின் வீட்டிலேயே தங்கி இருந்துள்ளார். அவர் மதுகுடிக்க பணம் கேட்டு அடிக்கடி தொந்தரவு செய்து வந்துள்ளார். இந்த நிலையில் குடிபோதையில் இருந்த அவர் நேற்று முன்தினம் இரவு தண்டுமாரி வீட்டிற்கு சென்றார். அப்போது இருவருக்கும் இடையே வாக்குவாதம் ஏற்பட்டுள்ளது. ஒருகட்டத்தில் வாக்குவாதம் முற்றி கைகலப்பாக மாறியது. இதில் தங்கராஜ் கையால் தண்டுமாரியை சரமாரியாக அடித்துள்ளார்.

ஆத்திரம் அடைந்த தண்டுமாரி, அவரது மகன் போடி, தண்டுமாரியின் தங்கை கன்னியம்மாள் ஆகிய 3 பேரும் சேர்ந்து தங்கராஜை தாக்கி உள்ளனர். மயங்கி கீழே விழுந்த அவரது தலையில் வீட்டில் இருந்த அம்மிக்கல்லை 3 பேரும் சேர்ந்து தூக்கி போட்டுள்ளனர். இதில், மண்டை உடைந்து சம்பவ இடத்திலேயே தங்கராஜ் பரிதாபமாக உயிரிழந்தார். இதையடுத்து 3 பேரும் அங்கிருந்து தப்பி ஓடிவிட்டனர்.

இதுகுறித்து தகவல் அறிந்த சத்துவாச்சாரி போலீஸ் இன்ஸ்பெக்டர் புகழேந்தி, வேலூர் வடக்கு இன்ஸ்பெக்டர் நாகராஜன் ஆகியோர் சம்பவ இடத்துக்கு சென்று பார்வையிட்டு விசாரணை நடத்தினர். பின்னர் தங்கராஜின் உடலை கைப்பற்றி பிரேத பரிசோதனைக்காக அடுக்கம்பாறை அரசு மருத்துவமனைக்கு அனுப்பி வைத்தனர்.

இது தொடர்பாக சத்துவாச்சாரி போலீசார் கொலை வழக்குப்பதிந்து தலைமறைவான தண்டுமாரி உள்ளிட்ட 3 பேரை வலைவீசி தேடி வருகின்றனர்.

இந்த சம்பவம் அப்பகுதியில் பரபரப்பை ஏற்படுத்தி உள்ளது.