தட்டார்மடம் அருகே துணிகரம் ஜோதிடர் வீட்டில் 111 பவுன் நகை கொள்ளை மேற்கூரை ஓடுகளை பிரித்து மர்மநபர்கள் கைவரிசை

தட்டார்மடம், 

தட்டார்மடம் அருகே ஜோதிடர் வீட்டின் மேற்கூரை ஓடுகளை பிரித்து 111 பவுன் நகைகளை கொள்ளையடித்து சென்ற மர்மநபர்களை போலீசார் வலைவீசி தேடி வருகின்றனர்.

ஜோதிடர்

தூத்துக்குடி மாவட்டம் தட்டார்மடம் அருகே அழகப்பபுரம் பஞ்சாயத்து சித்தன்குடியிருப்பு கிராமத்தைச் சேர்ந்தவர் பால்துரை (வயது 70). இவர் ஜோதிடம் பார்க்கும் தொழில் செய்து வருகிறார். இவருடைய மனைவி சரோஜா. இவர்களுக்கு 2 மகன்களும், 3 மகள்களும் உள்ளனர். அனைவருக்கும் திருமணமாகி, வெளியூர்களில் வசித்து வருகின்றனர்.

பால்துரை தன்னுடைய மனைவியுடன் சொந்த ஊரில் வசித்து வருகிறார். இவருக்கு சொந்தமாக அப்பகுதியில் 2 வீடுகள் உள்ளன. பால்துரை தனது பூர்வீக ஓட்டு வீட்டில் இருந்து, தினமும் காலை முதல் மாலை வரையிலும் பொதுமக்களுக்கு ஜோதிடம் பார்ப்பது வழக்கம். பின்னர் அவர் இரவில் தனது வீட்டின் எதிரே உள்ள கான்கிரீட் மாடி வீட்டில் சென்று தூங்குவது வழக்கம்.

நகை, பணம் கொள்ளை

நேற்று முன்தினம் மாலையில் வழக்கம்போல் பால்துரை ஜோதிடம் பார்த்து முடிந்ததும், தனது பூர்வீக வீட்டை பூட்டி விட்டு, இரவில் கான்கிரீட் மாடி வீட்டில் சென்று தூங்கினார். இதனை நோட்டமிட்ட மர்மநபர்கள் நள்ளிரவில் ஓட்டு வீட்டின் மேற்கூரை ஓடுகளை பிரித்து உள்ளே நுழைந்தனர். அங்கு வீட்டில் இருந்த பீரோவை உடைத்து, அதில் இருந்த 111 பவுன் தங்க நகைகள், ரூ.2 லட்சத்து 50 ஆயிரம் ஆகியவற்றை கொள்ளையடித்து சென்றனர்.

நேற்று காலையில் பால்துரை தனது பூர்வீக வீட்டுக்கு சென்றார். அப்போது அந்த வீட்டின் மேற்கூரை ஓடுகள் பிரிக்கப்பட்டு கிடந்ததையும், வீட்டில் இருந்த பீரோ உடைக்கப்பட்டு நகை, பணம் கொள்ளையடிக்கப்பட்டதையும் அறிந்து அதிர்ச்சி அடைந்தார். இதுகுறித்து தட்டார்மடம் போலீஸ் நிலையத்துக்கு தகவல் தெரிவிக்கப்பட்டது.

போலீசார் விசாரணை

உடனே சாத்தான்குளம் துணை போலீஸ் சூப்பிரண்டு பாலச்சந்திரன், தட்டார்மடம் போலீஸ் இன்ஸ்பெக்டர் (பொறுப்பு) ராஜா சுந்தர் மற்றும் போலீசார் சம்பவ இடத்துக்கு விரைந்து சென்று பார்வையிட்டு விசாரணை நடத்தினர். கொள்ளை நடந்த வீட்டில் பதிவான தடயங்களை கைரேகை நிபுணர்கள் பதிவு செய்தனர்.

தூத்துக்குடியில் இருந்து போலீஸ் மோப்ப நாய் வரவழைக்கப்பட்டது. அது கொள்ளை நடந்த வீட்டில் மோப்பம் பிடித்து விட்டு, தெரு வழியாக மெயின் ரோடு வரையிலும் ஓடிச் சென்றது. ஆனால் அது யாரையும் கவ்வி பிடிக்கவில்லை. எனவே கொள்ளையர்கள் மெயின் ரோட்டில் இருந்து வாகனத்தில் தப்பி சென்று இருக்கலாம் என்று தெரிகிறது.

கொள்ளையர்களுக்கு வலைவீச்சு

இதுகுறித்து போலீசார் வழக்குப்பதிவு செய்து, வீட்டின் மேற்கூரை ஓடுகளை பிரித்து, நகை, பணத்தை கொள்ளையடித்து சென்ற கொள்ளையர்களை வலைவீசி தேடி வருகின்றனர். இந்த சம்பவம் அப்பகுதியில் பெரும் பரபரப்பை ஏற்படுத்தியது.