ஏரல் அருகே பயங்கரம்: பிரபல ரவுடி கழுத்து அறுத்துக்கொலை மனைவியிடம் தவறாக நடக்க முயன்றதால் நண்பரே தீர்த்துக்கட்டினார்

ஏரல், 

ஏரல் அருகே பிரபல ரவுடி கழுத்தை அறுத்துக் கொலை செய்யப்பட்டார். தனது மனைவியிடம் தவறாக நடக்க முயன்றதால் நண்பரே அவரை தீர்த்துக்கட்டியது போலீசாரின் விசாரணையில் தெரியவந்து உள்ளது.

பிரபல ரவுடி

தூத்துக்குடி மாவட்டம் ஸ்ரீவைகுண்டம் அருகே பேட்மாநகரம் வீரன் சுந்தரலிங்கம் நகர் நடுத்தெருவைச் சேர்ந்தவர் இசக்கியப்பன். இவருடைய மகன் வினோத் (வயது 28).

பிரபல ரவுடியான இவர் மீது ஏரல், குரும்பூர், ஸ்ரீவை குண்டம் உள்ளிட்ட போலீஸ் நிலையங்களில் கொலை, கொலை முயற்சி, கொலை மிரட்டல், அடிதடி உள்ளிட்ட பல்வேறு வழக்குகள் நிலுவையில் உள்ளன. இவரது பெயர், ஸ்ரீவைகுண்டம் போலீஸ் நிலையத்தில் ரவுடி பட்டியலில் உள்ளது.

கழுத்தை அறுத்துக்கொலை

நேற்று முன்தினம் இரவில் ஏரல் அருகே மேலமங்களகுறிச்சி தாமிரபரணி ஆற்றங்கரையில் உள்ள சுடுகாட்டு பகுதியில், வினோத் அரை நிர்வாண நிலையில் கழுத்தை அறுத்துக் கொலை செய்யப்பட்டு கிடந்தார். அங்கு அவரது பேண்ட், சட்டை ரத்தம் தோய்ந்த நிலையில் தனியாக கிடந்தது. மேலும் வினோத்தின் மோட்டார் சைக்கிளும் அங்கு நின்றது.

அந்த வழியாக சென்றவர்கள் இதனைப் பார்த்து அதிர்ச்சி அடைந்து, ஏரல் போலீஸ் நிலையத்துக்கு தகவல் தெரிவித்தனர். உடனே ஸ்ரீவைகுண்டம் துணை போலீஸ் சூப்பிரண்டு சகாய ஜோஸ், ஏரல் போலீஸ் இன்ஸ்பெக்டர் பட்டாணி, சப்-இன்ஸ்பெக்டர் சண்முகசுந்தரம் மற்றும் போலீசார் சம்பவ இடத்துக்கு விரைந்து சென்று பார்வையிட்டனர்.

பரபரப்பு தகவல்கள்

கொலை செய்யப்பட்ட வினோத்தின் உடலை கைப்பற்றி பிரேத பரிசோதனைக்காக தூத்துக்குடி அரசு ஆஸ்பத்திரிக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து விசாரணை நடத்தினர். போலீசாரின் முதல்கட்ட விசாரணையில் பரபரப்பு தகவல்கள் வெளியானது. அதன் விவரம் வருமாறு:-

ஏரல் சேர்மன் கோவில் தெருவைச் சேர்ந்தவர் முனியசாமி மகன் தனுஷ்கோடி (30). ரவுடியான இவரும், வினோத்தும் நண்பர்கள். வினோத் அடிக்கடி தனுஷ்கோடியின் வீட்டுக்கு செல்வது வழக்கம். கடந்த சில நாட்களுக்கு முன்பு தனுஷ்கோடி ஒரு வழக்கு தொடர்பாக, சிறையில் இருந்தார். அப்போது தனுஷ்கோடியின் வீட்டுக்கு வினோத் சென்றார். அங்கு தனியாக இருந்த தனுஷ்கோடியின் மனைவியிடம், வினோத் தவறாக நடக்க முயன்றார்.

அண்ணனிடம் எச்சரித்து விட்டு...

இதுகுறித்து தனுஷ்கோடியின் மனைவி, தன்னுடைய கணவரிடம் தெரிவித்தார். இதனால் ஆத்திரம் அடைந்த தனுஷ்கோடி, வினோத்தை கொலை செய்ய திட்டமிட்டார். இதுகுறித்து தனுஷ்கோடி, வினோத்தின் அண்ணனான பேச்சிராஜிடமும் (31) எச்சரித்தார். இதுகுறித்து பேச்சிராஜ் தன்னுடைய தம்பி வினோத்திடம் தெரிவித்தார். ஆனாலும் வினோத் அதனை ஒரு பொருட்டாக கருதவில்லை.

மேல மங்களகுறிச்சி தாமிரபரணி ஆற்றங்கரையில் இரவில் தனுஷ்கோடி, வினோத் உள்ளிட்டவர்கள் மது அருந்துவது வழக்கம். இந்த நிலையில் நேற்று முன்தினம் இரவில் அங்கு தனுஷ்கோடி, வினோத்தை கழுத்தை அறுத்துக் கொலை செய்து விட்டு, தலைமறைவாகி உள்ளார்.

மேற்கண்ட தகவல்கள் போலீசாரின் விசாரணையில் தெரியவந்தது.

வேறு யாருக்கும் தொடர்பா?

தலைமறைவான தனுஷ்கோடியை போலீசார் வலைவீசி தேடி வருகின்றனர். வினோத் கொலையில் தனுஷ்கோடிக்கு உடந்தையாக யாரேனும் செயல்பட்டனரா? என்பது குறித்தும் போலீசார் தீவிர விசாரணை நடத்தி வருகின்றனர்.

நண்பனின் மனைவியிடம் தவறாக நடக்க முயன்ற பிரபல ரவுடி கழுத்தை அறுத்து கொலை செய்யப்பட்ட சம்பவம் அந்த பகுதியில் பெரும் பரபரப்பை ஏற்படுத்தியது.