வெறையூர் அருகே தொழிலாளி வீட்டில் ரூ.4 லட்சம் நகை–பணம்திருட்டு பூட்டை உடைத்து மர்மநபர்கள் கைவரிசை

வாணாபுரம்,

திருவண்ணாமலை மாவட்டம் வெறையூரை அடுத்த அரடாப்பட்டு கிராமத்தை சேர்ந்தவர் விஜயன் (வயது 30). முடிதிருத்தும் தொழிலாளி. இவர் குடும்பத்தினருடன் வீட்டை பூட்டி விட்டு சென்னைக்கு சென்றிருந்தார். இந்த நிலையில் கடந்த 26–ந் தேதி இவரது வீட்டின் பூட்டு உடைக்கப்பட்டு கிடப்பதை பக்கத்து வீட்டை சேர்ந்த லட்சுமி என்பவர் பார்த்துள்ளார். அவர் இதுகுறித்து விஜயனுக்கு தகவல் தெரிவித்தார்.

இதனையடுத்து விஜயன் தனது வீட்டிற்கு வந்து பார்த்த போது பீரோ உடைக்கப்பட்டு கிடந்தது. அதில் இருந்த 15 பவுன் நகை, ரூ.40 ஆயிரம் பணத்தை மர்மநபர்கள் திருடிச் சென்றது அவருக்கு தெரியவந்தது.

இதுகுறித்து அவர் வெறையூர் போலீஸ் நிலையத்தில் புகார் செய்தார். அதன் பேரில் போலீசார் வழக்குப்பதிவு செய்து நகை பணத்தை திருடிச் சென்ற மர்மநபர்களை தேடி வருகின்றனர்.

திருட்டு போன நகை, பணத்தின் மொத்த மதிப்பு ரூ.4 லட்சம் இருக்கும் என போலீசார் தெரிவித்தனர்.