திண்டுக்கல் மாவட்டத்தில், பொருளாதாரத்தில் மிகவும் பின்தங்கிய: எஸ்.எஸ்.எல்.சி. மாணவர்களுக்கு ‘தினத்தந்தி’யின் கல்வி நிதி - போலீஸ் சூப்பிரண்டு சக்திவேல் நாளை வழங்குகிறார்

திண்டுக்கல், 

‘தினத்தந்தி’ நாளிதழ் கல்விப் பணியில் பல்வேறு புரட்சிகளை செய்து வருகிறது. இதில் மாநில அளவில் எஸ்.எஸ்.எல்.சி. மற்றும் பிளஸ்-2 பொதுத்தேர்வுகளில் முதல் மதிப்பெண் பெற்ற மாணவ-மாணவிகளுக்கு ரொக்கப்பரிசு வழங்கி ஊக்குவித்து வந்தது.

அதேபோல் மாணவர் பரிசு திட்டத்தின் மூலம் மாவட்டம் தோறும் எஸ்.எஸ்.எல்.சி. பொதுத்தேர்வில் முதல் 3 இடங்களை பிடித்த மாணவ- மாணவிகள் அனைவருக்கும் ரொக்கப்பரிசு மற்றும் ‘தினத்தந்தி’யின் பாராட்டு சான்றிதழ் வழங்கப்பட்டது.

மேலும் கடந்த 2014-2015-ம் கல்வி ஆண்டு முதல் ‘தினத்தந்தி’ கல்விநிதி திட்டம் அறிமுகப்படுத்தப்பட்டது. இதன்படி பொருளாதாரத்தில் மிகவும் பின்தங்கிய மாணவ-மாணவிகளின் மேல்படிப்புக்கு ‘தினத்தந்தி’ நிதி உதவி அளித்து வருகிறது.

இந்த திட்டத்தின் கீழ் ஒவ்வொரு ஆண்டும் தமிழகம் மற்றும் புதுச்சேரியில் ஒரு மாவட்டத்துக்கு தலா 10 மாணவ-மாணவிகள் வீதம் 34 மாவட்டங்களை சேர்ந்த 340 மாணவ-மாணவிகளுக்கு தலா ரூ.10 ஆயிரம் வீதம் ரூ.34 லட்சம் ரொக்கப்பரிசு வழங் கப்பட்டு வருகிறது.

அதன்படி கடந்த 2017-2018-ம் கல்வி ஆண்டில் ‘தினத்தந்தி’ கல்விநிதி திட்டத்தின் கீழ் தலா ரூ.10 ஆயிரம் ரொக்கப்பரிசு பெற தகுதி பெற்றுள்ள திண்டுக்கல் மாவட்டத்தை சேர்ந்த எஸ்.எஸ்.எல்.சி. தேர்ச்சி பெற்ற மாணவ-மாணவிகள் 10 பேரின் பெயர் விவரம் வருமாறு:-

1.ச.சம்யுக்தா, அரசு பெண்கள் மேல்நிலைப்பள்ளி, வேடசந்தூர். 2.பா.உமாமகேஸ்வரி, அரசு பெண்கள் மேல்நிலைப்பள்ளி, வடமதுரை. 3.மு.முகமதுமுஹ்சின், எம்.எஸ்.பி.சோலைநாடார் நினைவு மேல்நிலைப்பள்ளி, திண்டுக்கல். 4.ப.ராஜராஜேஸ்வரி, கலைமகள் மேல்நிலைப்பள்ளி, வடமதுரை. 5.தே.கனகலட்சுமி, புனித வளனார் பெண்கள் மேல்நிலைப்பள்ளி, திண்டுக்கல். 6.பா.பானுமதி, புனித வளனார் பெண்கள் மேல்நிலைப்பள்ளி, திண்டுக்கல். 7.ர.ரத்தினமாலா, புனித வளனார் பெண்கள் மேல்நிலைப்பள்ளி, திண்டுக்கல். 8.பா.கோகிலா, நா.சு.வி.வி.பெண்கள் மேல்நிலைப்பள்ளி, பட்டிவீரன்பட்டி. 9.சி.சுருதி, ஸ்ரீரேணுகாதேவி மேல்நிலைப்பள்ளி, நெய்க்காரப்பட்டி. 10.செ.சங்கீத்குமார், ஆர்.சி.சகாயராணி உயர்நிலைப்பள்ளி, சின்னாளப்பட்டி.

இந்த 10 மாணவ-மாணவிகளுக்கும் ‘தினத்தந்தி’ கல்விநிதி வழங்கும் விழா, திண்டுக்கல் எம்.எஸ்.பி.சோலைநாடார் நினைவு மேல்நிலைப்பள்ளி வளாகத்தில் நாளை (வெள்ளிக்கிழமை) மாலை 3.30 மணிக்கு நடைபெறுகிறது.

விழாவில், திண்டுக்கல் மாவட்ட போலீஸ் சூப்பிரண்டு சக்திவேல் தலைமை தாங்கி, மாணவ-மாணவிகளுக்கு ‘தினத்தந்தி’ கல்விநிதியை வழங்கி பேசுகிறார். முதன்மை கல்வி அலுவலர் சாந்தகுமார், மாவட்ட கல்வி அலுவலர் சுப்ரமணியன் ஆகியோர் வாழ்த்தி பேசுகின்றனர். எம்.எஸ்.பி. சோலைநாடார் நினைவு மேல்நிலைப்பள்ளி தாளாளர் பி.முருகேசன் முன்னிலை வகித்து, பாராட்டி பேசுகிறார்.

விழா தொடக்கமாக ‘தினத்தந்தி’ திண்டுக்கல் மேலாளர் எஸ்.லட்சுமணன் வரவேற்புரை ஆற்றுகிறார். இறுதியில் எம்.எஸ்.பி.சோலைநாடார் நினைவு மேல்நிலைப்பள்ளி தலைமை ஆசிரியர் கே.பால்பாண்டி நன்றி கூறுகிறார்.