குடியாத்தம் அருகே: லாரி டியூப்களில் சாராயம் கடத்த முயற்சி; காருடன் வாலிபர் கைது - ஆந்திர வனப்பகுதிக்குள் 2 பேர் தப்பி ஓட்டம்

குடியாத்தம்,

குடியாத்தம் வனச்சரகத்தில் கடந்த சில நாட்களாக காட்டு யானைகள், பயிர்களை சேதப்படுத்தி வந்தன. இதனையடுத்து மாவட்ட வன அலுவலர் பார்கவிதேஜா உத்தரவின்பேரில் குடியாத்தம் வனச்சரக அலுவலர் மகேந்திரன், வனவர்கள் முருகன், ரவி, வனக்காப்பாளர் வெங்கடேசன் உள்ளிட்டோர் ரோந்து பணியில் ஈடுபட்டனர். அப்போது சைனகுண்டா பகுதியில் கொண்டமகோவில் பகுதியில் ஒரு காரில் மூட்டைகளை ஏற்றுவதை பார்த்து அதனை சுற்றி வளைத்தனர்.

அப்போது 2 பேர் அங்கிருந்து மோட்டார் சைக்கிளில் ஆந்திர வனப்பகுதிக்குள் தப்பியோடிவிட்டனர். காரை சோதனை போட்டபோது, லாரி டியூப்களில் சாராயம் இருப்பது தெரியவந்தது. ஒருவர் மட்டும் காருக்குள் சிக்கினார்.

விசாரணையில் அவரது பெயர் வெங்கடேசன் (வயது 22) என்பதும் ஒடுகத்தூர் அருகே உள்ள சின்னந்தூரையை சேர்ந்தவர் என்பதும் தெரியவந்தது. பறிமுதல் செய்யப்பட்ட கார் மற்றும் 2 டியூப்களில் இருந்த சாராயத்துடன் பிடிபட்ட அவரை வனத்துறையினர் குடியாத்தம் மதுவிலக்கு போலீசாரிடம் ஒப்படைத்தனர். போலீசார் வெங்கடேசனை கைது செய்து விசாரணை நடத்தி வருகின்றனர்.