கியா மோட்டார்ஸின் பேட்டரி கார் ‘சோல்’

கியா மோட்டார்ஸ் நிறுவனம் ஏற்கனவே ‘இநிரோ’ என்ற பெயரில் பேட்டரி கார்களை தயாரித்துள்ளது. இந்த மாடல் காரை விட சோல் மேம்பட்ட ரகமாக வந்துள்ளது. இதன் பேட்டரி 204 ஹெச்.பி. திறனையும் 400 நியூட்டன் மீட்டர் டார்க் இழு விசையையும் வெளிப்படுத்தக் கூடியது. முந்தைய மாடலான இநிரோ 100 கி.மீ. வேகத்தை 7.8 விநாடிகளில் எட்டியது. அதை விட இந்தக் கார் அதி விரைவாகச் செல்லும். எனவே முந்தைய மாடலை விட இது சிறப்பானது என்கிறது கியா மோட்டார்ஸ். இதில் உள்ள 64 கிலோவாட் பேட்டரி இந்தக் காருக்கு கூடுதல் திறனை அளிக்கிறது. இதுவும் ஒரு முறை சார்ஜ் செய்தால் 485 கி.மீ. தூரம் வரை ஓடும் என தெரிகிறது.

மூன்றாம் தலைமுறையாக கியா நிறுவனத்தின் ‘சோல்’ மாடல் கார்கள் வந்துள்ளது. இருப்பினும் வடிவமைப்பில் முன் பகுதியிலும், பின் பகுதியிலும் பெருமளவிலான மாற்றங்கள் செய்யப்பட்டுள்ளன. அதிலும் குறிப்பாக பின்புறத்தில் உள்ள விளக்குகள் மிக நேர்த்தியாக உள்ளன. மேலும் காரை சார்ஜ் செய்யும் போர்ட் முன்புற பம்பரில் வெகு சிறப்பாக அமைக்கப்பட்டுள்ளது. காருக்கு 17 அங்குல ஸ்போக் சக்கரம் மிக நேர்த்தியாக உள்ளது. சொகுசான பயணத்துக்கு இதில் மிகச் சிறப்பான சஸ்பென்ஷன் தரப்பட்டுள்ளது. நான்கு விதமான டிரைவிங் வசதிகள் இதில் உள்ளன.

இதன் முன்பகுதியில் 10 அங்குல தொடு திரை மிகச் சிறப்பான பொழுது போக்கு அம்சங்களை அளிக்கிறது. வழக்கமான காரில் உள்ளதைப் போன்று ஆண்ட்ராய்டு ஆட்டோ, ஆப்பிள் கார்பிளே, குரல் வழி செயல்பாடு, டயல் அமைப்பு போன்று கியர் தேர்வு வசதி ஆகியன இதன் சிறப்பம்சங்களாகும். இதில் யு.வி.ஓ. டெலிமேட்டிக்ஸ் சிஸ்டம் உள்ளது. இதன் மூலம் கார் பற்றிய தகவலை ஸ்மார்ட்போன் வாயிலாக உரிமையாளர்கள் பெற்றுக் கொள்ள முடியும்.

ஹூண்டாய் நிறுவனத்தின் துணை நிறுவனம்தான் கியா மோட்டார்ஸ். இந்நிறுவனமும் ஆந்திர மாநிலம் ஸ்ரீ சிட்டியில் ஆலை அமைத்து வருகிறது. விரைவிலேயே இந்நிறுவன கார்களும் இந்திய சாலைகளில் வலம் வர உள்ளன. மத்திய அரசு பேட்டரி கார்களுக்கு முன்னுரிமை அளித்து வரும் நிலையில் கியா மோட்டார்ஸின் ‘சோல்’ இந்திய சாலைகளில் வலம் வரும் நாள் வெகு தொலைவில் இல்லை எனலாம்.